ma ’ongs pa, de ni ma phyin pa’o; da ltar byung ba, de ni gnas pa med pa’o. gang de ltar sems dang sems las byung ba skyes pa dang, zhig pa dang, zhu ba rnams la rtog cing byang chub sgrub pa’i dge ba’i rtsa ba rnams kyang yang dag par sgrub pa, ’di ni byang chub sems dpa’i dus gsum la mkhas pa zhes bya’o.

dus gsum la mkhas pa’i rnam grangs gzhan yang bstan par bzhed nas gzhan yang gang ’das pa, de ni zad pa’o zhes bya ba la sogs pa gsungs te, ’das pa’i chos rnams ni rgyu dang ’bras bu bcas te, ’gags pas na zad pa zhes bya’o, ma ’ongs pa’i chos rnams ni rgyu dang ’bras bu bcas te ma phyin pas na ma phyin pa’o, da ltar byung ba’i chos rnams ni rgyus ’bras bu bskyed nas de ma thag tu ’gags pas na gnas pa med pa’o. de ltar dus gsum gyi mtshan nyid bstan nas, de la mkhas pa bstan pa’i phyir gang de ltar sems dang sems las byung ba zhes bya ba la sogs pa gsungs so, rtog cing zhes bya ba’i sgra re re dang sbyar te, sems dang sems las byung ba skyes pa rnams la rtog pa dang, sems dang sems las byung ba zhig pa rnams la rtog pa dang, sems dang sems las byung ba zhu ba rnams la rtog ces bya bar sbyar ro; de la da ltar gyi sems dang sems las byung ba rnams rgyus ’bras bu bskyed de, bskyed ma thag tu rgyu dang ’bras bu bcas te, ’gags pas dngos po med do zhes rtog pa ni sems dang sems las byung ba skyes pa rnams la rtog pa zhes bya’o; ’das pa’i sems dang sems las byung ba rnams ni rgyu dang bcas te ’bras bu ’gags pas dngos po med do zhes rtog pa ni sems dang sems las byung ba’i zhig pa rnams la rtog pa zhes sbyar ro; ma ’ongs pa’i sems dang sems las byung bas ni rgyu dang bcas te ’bras bu ma skyes pas na dngos po med do zhes rtog pa ni zhu ba rnams la rtog pa zhes bya’o. de ltar dus gsum gyi dngos po rnams yang dag par na dngos po med pas dge ba’i tshogs rnams kyang dngos po med pa’i phyir tshogs gnyis kyang mi ’grub pa ma snyam pa la byang chub sgrub pa’i dge ba’i rtsa ba rnams kyang yang dag par sgrub pa zhes bya bar smos te, tshogs gang gis byang chub sgrub par byed pa’i tshogs kyi mtshan nyid dge ba’i rtsa ba ni byang chub sgrub pa’i dge ba’i rtsa ba zhes bya ste, de yang bsod nams dang ye shes kyi tshogs kyi mtshan nyid do, de ni ’di skad du don dam pas dus gsum gyi dngos po rnams kyang rang bzhin med mod kyi, kun rdzob tu ji lta ji ltar las byas pa de lta de ltar ’bras bu med pa ma yin te, de bas na bla na med pa’i byang chub thob par byed pa’i rgyu bsod nams dang ye shes kyi tshogs kyang sgrub par byed ces bya bar ston to.
Cf. Kpv. 97-98: yadi tāvad atītaṃ cittaṃ tat kṣīṇaṃ, yād anāgataṃ cittaṃ tad asaṃprāptaḥ, atha pratyutpannasya cittasya sthitir nāsti. ... cittaṃ hi kāshyapa nadīsrotasadṛshaṃm anavasthitam utpannaṃ bhagnavilīna. Cf. also supra, ṭ. fol. 79a2 and mūla p. 487.