shes rab kyi phung po yongs su rdzogs nas, rnam par grol ba’i phung po yongs su rdzogs par byed pa dang;

’di ni bya ba byas pa rab tu sgrub pa (3, cf. fol. 148b2) bstan te, ’di ltar ye shes shin tu rnam par dag pas ni nyon mongs pa spangs pa mngon sum du byed pa’i phyir ro. de bas na mdo las kyang shes rab kyi phung po yongs su rdzogs nas rnam par grol ba’i phung po yongs su rdzogs par byed pa zhes gsungs te, de yang tshul khrims rnam par dag pa ni ’gyod pa med par ’gyur ro, ’gyod pa med na dga’ ba dang mchog tu dga’ ba dang shin tu rnam par sbyangs pa dang bde bar ’gyur ro, bde bar gyur pa’i sems mnyam par ’jog go, sems rnam par gzhag na yang dag pa ji lta ba bzhin du rab tu shes, yang dag pa ji lta ba bzhin du mthong bar ’gyur ro, yang dag pa ji lta ba bzhin du shes shing mthong bas skyo bar ’gyur ro, skyo bar ’gyur na ’dod pa’i zag pa las sems rnam par grol ba dang, srid pa’i zag pa dang ma rig pa’i zag pa las sems rnam par grol te, rgyud la dri ma med pa ’thob par ’gyur pas na rnam par grol ba’i phung po yongs su rdzogs par byed pa zhes bya’o.
’dis ni ’bras bu (5, cf. fol. 148a1) bstan te, rnam par grol ba’i phung po ni bslab pa gsum la zhugs pa’i ’bras bu yin pa’i phyir ro.