’dus byas dang ’dus ma byas la mkhas pa rnam grangs gzhan yang bstan par bzhed nas gzhan yang ’dus byas la mkhas pa ni gang ’khor ba’i rgyun gyi nyon mongs pa rnams gcod pa dang zhes bya ba la sogs pa gsungs so, de la ’dus byas la mkhas pa rnam pa gnyis te, 1) ’jig rten pa’i rgyu la mkhas pa dang, 2) ’jig rten las ’das pa’i rgyu la mkhas pa’o. 1) ’jig rten pa’i rgyu la mkhas pa yang rnam pa gnyis te, a) sdug bsngal gyi rgyu spong ba la mkhas pa dang, b) bde ba’i rgyu bskyed pa la mkhas pa’o; gang ’khor ba’i rgyun gyi nyon mongs pa rnams gcod pa dang zhes bya bas a) sdug bsngal gyi rgyu yongs su spong ba la mkhas pa bstan te, ’khor bar rgyun du skye bar byed pa’i rgyu ’dod chags la sogs pa kun tu sbyor ba’i tshogs ni ’khor ba’i rgyun gyi nyon mongs pa zhes bya’o, de rnams spong bar byed pa ni nyon mongs pa rnams gcod pa zhes bya’o; ’khor ba’i rgyun gyi dge ba’i rtsa ba rnams mi gcod pa dang zhes bya bas b) bde ba’i rgyu bskyed pa la mkhas pa bstan te, gang ’khor ba la rgyun du lha dang mir skye bar byed pa’i rgyu dge ba bcu dang, ’dod ma chags pa dang, zhe mi sdang ba la sogs pa’i dge ba’i rtsa ba rnams gcig nas gcig tu rgyun mi ’chad par byed pas na ’khor ba’i rgyun mi dge ba’i rtsa ba mi gcod pa zhes bya’o. 2) ’jig rten las ’das pa’i rgyu la mkhas pa yang rnam pa gnyis te, a) byang chub chen po’i rgyu rgyun mi gcod pa dang, b) zhi ba phyogs gcig pa’i rgyu sgrub par mi byed pa’o; byang chub sgrub pa’i kun tu sbyor ba rnams kyi rgyun ’brel pa zhes bya bas a) byang chub chen po’i rgyu rgyun mi gcod pa bstan te, byang chub kyi don ni gong du smras par zad do, kun tu sbyor ba ni zhi gnas dang lhag mthong sgrub par byed pa’o, zhi gnas dang lhag mthong bsgom pa gang gis byang chub thob par byed pa de ni byang chub sgrub pa’i kun tu sbyor ba zhes bya ste, de ltar bsgom pa rgyun mi gcod pa ni kun tu sbyor ba rnams kyi rgyun ’brel pa’o; nyi tshe ba’i kun tu sbyor ba rnams mi spyad pa zhes bya bas b) zhi ba phyogs gcig pa’i rgyu sgrub par mi byed pa bstan te, nyi tshe ba’i kun tu sbyor ba ni zhi ba phyogs gcig pa’i mya ngan las ’das pa thob par ’gyur ba’i rgyu zhi gnas dang lhag mthong sgom par byed pa’o, mi spyad pa ni de lta bu’i rgyu la mi ’jug pa’o. yang na ’khor ba’i rgyun gyi nyon mongs pa rnams gcod kyang byang chub chen po thob par byed pa’i rgyu rgyun mi gcod pas na byang chub sgrub pa’i kun tu sbyor ba rnams kyi rgyun ’brel pa zhes bya’o; ’khor bar skye ba’i dge ba’i rtsa ba rnams rgyun mi gcod pas zhi ba phyogs gcig pa’i mya ngan las ’das par mi lhung ba’i phyir nyi tshe ba’i kun tu sbyor ba rnams mi spyad pa zhes bya’o.
gang yang stong pa nyid ces bya ba la sogs pas ’dus ma byas la mkhas pa bstan te, de yang ting nge ’dzin gsum la dbang thob pa dang, gdams ngag dang rjes su bstan pa la mi brten par de bzhin nyid khong du chud pa dang, de bzhin nyid khong du chud kyang de’i phyogs la mi gnas pa’o; gang yang stong pa nyid dang, mtshan ma med pa zhes bya ba la sogs pas ting nge ’dzin gsum la dbang thob pa bstan te, stong pa nyid la sogs pa ni gong du bshad par zad do; ye shes gang gis ting nge ’dzin de gsum la dbang byed par ’gyur ba de la ni ’dris par byed pa’i ye shes zhes bya ste, ye shes de mngon sum du gyur pa’am, ye shes de rtogs pa ni rtogs pa la mkhas pa’o; byang chub tu gzhan gyi dring la mi ’jog cing zhes bya bas gdams ngag dang rjes su bstan pa la mi brten par de bzhin nyid khong du chud pa bstan te, de bzhin gshegs pa dang mkhan po dang slob dpon gyis bstan pa’i man ngag la mi brten par stong pa gnyis su med pa’i mtshan nyid khong du chud pa ni byang chub gzhan gyi dring la mi ’jog pa zhes bya’o; ’dus ma byas mngon sum du mi byed ces bya bas de bzhin nyid khong du chud kyang de’i phyogs la mi gnas pa bstan te, ’dus ma byas ni mya ngan las ’das pa’am stong pa nyid do; mngon sum du mi byed pa ni de dag khong du chud cing thob kyang, de’i phyogs la mi gnas pa’o.
Title
