phyogs bcu’i ’jig rten gyi khams mtha’ yas mu med pa dag na sangs rgyas bcom ldan ’das rnams kyi sangs rgyas kyi zhing gi yon tan bkod pa gang yin pa, de dag thams cad mthong ste. mthong nas kyang rang gi tshul khrims yongs su dag pas rang gi zhing gi yon tan bkod pa yongs su dag par bya ba’i phyir bsod nams dang ye shes kyi tshogs bsags pa rnams yongs su bsngo ste, tshul khrims kyi yon tan la gnas pa de dag gi yongs su bsngo ba yongs su ’grub par ’gyur ro.

sangs rgyas kyi zhing gi yon tan bkod pa zhes bya ba ni sangs rgyas kyi zhing sa gzhi bai dū rya’i kha dog dang dpag bsam gyi shing gi phreng ba dang bdud rtsi’i rdzing la sogs pa dang ldan pa’o; rang gi tshul khrims yongs su dag pas rang gi zhing gi yon tan bkod pa yongs su dag par bya ba’i phyir bsod nams dang ye shes kyi tshogs bsags pa rnams yongs su sngo ste zhes bya ba ni sangs rgyas bcom ldan ’das rnams kyi zhing gi yon tan mthong nas bdag kyang nam sangs rgyas su ’gyur ba’i tshe zhing gi yon tan de lta bu dang ldan par gyur cig ces bdag gi bsod nams dang ye shes kyi tshogs ci bsags pa rnams tshul khrims yongs su dag pa’i mthus bsngo zhes bya ba’i don to, tshul khrims kyi mthus bsngos pas ji bzhin ’grub par ’gyur ram snyam pa la tshul khrims kyi yon tan la gnas pa de dag gi bsngo ba yongs su ’grub par ’gyur ro zhes bya ba smos te, chos nyid kyi tshul khrims dang ldan pa rnams ci bsams pa’am smon pa bzhin du ’grub pas bsngos pa bzhin du yongs su ’grub ces bya ba’i don to.