de dag lha’i rna ba’i mngon par shes pa’i ye shes kyis ’phags pa dang ’phags pa ma yin pa’i sgra rnams thos te. thos nas kyang ’phags pa’i sgra rnams la rjes su chags par yang mi ’gyur, ’phags pa ma yin pa’i sgra rnams la khong khro bar yang mi ’gyur te; de dag ’phags pa’i sgra rnams la byams pa chen po ’thob cing, ’phags pa ma yin pa’i sgra rnams la snying rje chen po ’thob bo.

193b7-194a3, ’phags pa’i sgra ni nyan thos dang, rang sangs rgyas dang, byang chub sems dpa’ dang, de bzhin gsegs pa rnams gsungs pa dang chos ’chad pa’i sgra’o; ’phags pa ma yin pa’i sgra ni so so’i skye bo rnams ’ong ba dang ’gro ba la sogs pa tha snyad sna tshogs kyi sgra ’byin pa’o; ’phags pa’i sgra la byams pa chen po ’thob cing zhes bya ba ni ’phags pa rnams kyi sgra thos nas chos bshad pa’i sgra ’dis sems can thams cad la phan btags so zhes sgra de la bdag nyid byams pa chen po’i sems bskyed pa’o; ’phags pa ma yin pa’i sgra la snying rje chen po ’thob ces bya ba ni so so’i skye bo rnams kyi smra ba’i sgra ni ’dod chags dang zhe sdang la sogs pa’i rgyu las byung bas na sdug bsngal sna tshogs bskyed pa’i rgyu yin no zhes snying rje chen po’i sems skye’o. gnyis ka’i cha la nyon mongs pa med pa bshad zin to.