don ’thun pa ni gang btang snyoms dang ldan pa’i sems mthon dman med cing thams cad mkhyen pa’i ye shes la yongs su bsngo ba’i sems so.

rnam grangs gzhan yang bstan pa’i phyir gzhan yang sbyin pa ni gang byams pa’i rjes su ’brang ba’i sems kyis yongs su gtong ba’o zhes bya ba la sogs pa gsungs te, sems can bde ba la dgod do snyam pa’i byams pa dang ldan pa’i sems kyis brel pa dang phongs pa la phyi dang nang gi dngos po gtong ba ni sbyin pa’o; snyan par smra ba ni gang dga’ ba dang mchog tu dga’ bar gyur pa’i sems mi gtong ba’o zhes bya ba la de ltar brel pa dang phongs pa rnams la phyi dang nang gi dngos po btang ste, de dag longs spyod kyi ’byor pa dang ldan par mthong nas dga’ ba dang mchog tu dga’ ba’i sems rgyun du ’byung ba ni snyan par smra ba’o, de la longs spyod dang ldan pa mthong nas sems mos par skye ba ni dga’ ba’o, brel pa dang phongs pa’i gang zag rnams brel pa dang phongs pa med par byas te, longs spyod la bkod pa’i dga’ ba bas byang chub sems dpa’ bdag gi longs spyod yongs su btang nas gzhan longs spyod dang ldan par mthong ba’i dga’ ba de bas kyang shas che ba’i mchog tu cher dga’ ba zhes bya’o; don spyod pa ni gang snying rje chen po yongs su dag pa’i sems bskyed pas zhes bya ba la gang la yang byams pa dang zhe sdang med par sems can thams cad kyi sdug bsngal bsal lo snyam pa’i snying rje chen po yongs su dag pa’i sems bskyed pas sems can thams cad kyi sdug bsngal sel cing de dag gi tshe ’di dang gzhan gyi las su bya ba la ’bad cing brtson pa ni don spyod pa’o; don mthun pa ni gang btang snyoms dang ldan pa’i sems mthon dman med cing zhes bya ba la sems can ’di la ni phan btags, ’di la ni phan mi gdags so zhes bya ba ni mthon dman gyi sems te, de lta bu med par btang snyoms dang ldan pa’i sems kyis sems can thams cad mkhyen pa’i ye shes la dgod do snyam du sems pa ni don mthun pa’o.