tshig ’bru zhes bya ba ni gang dkon mchog gsum gyi yon tan dang bsngags pa mtha’ yas pa bstan pa’o; don ces bya ba ni gang sangs rgyas kyi chos kyi sku mthong ba dang, ’dod chags dang bral zhing ’gog pa’i chos nyid dang, ’dus ma byas kyi sangs rgyas dang, chos dang, dge ’dun gyi yon tan sgrub pa’i ye shes so.

tshig ’bru zhes bya ba ni gang dkon mchog gsum gyi zhes bya ba la sogs pa la sangs rgyas kyi yon tan rig pa dang zhabs su ldan pa zhes bya ba la sogs pa dang, lha dang bcas pa’i ’jig rten gyi las rgal ces bya ba la sogs pa dang, dul bar mdzad, zhi bar mdzad, dbugs ’byin par mdzad ces bya ba la sogs pa dang, lam shes pa, lam rig pa, lam dang lam ma yin par mkhyen pa zhes bya ba la sogs pa yon tan dang bsngags pa mtha’ yas par bstan pa dang, dge ’dun la yang bcom ldan ’das kyi nyan thos kyi dge ’dun ni legs par zhugs pa zhes bya ba dang, sbyin pa’i gnas bsod nams kyi zhing zhes bya ba la sogs pa yon tan dang bsngags pa mtha’ yas par bstan pa ni tshig ’bru’o; don ces bya ba ni gang sangs rgyas kyi chos kyi sku mthong ba dang zhes bya ba la sogs pas sangs rgyas la ji skad brjod pa’i yon tan du mi lta’i, chos kyi sku nyid du mthong ba dang, chos la ji skad brjod pa’i yon tan du mi lta’i, don dam pa’i yon tan ’dod chags dang bral zhing skye ’gag med pa’i chos nyid du mthong ba dang, dge ’dun la ji skad brjod pa’i yon tan du mi lta’i, ’dus ma byas kyi chos nyid rtogs pa las byung bar mthong ba ste, de ltar sangs rgyas dang chos dang dge ’dun gyi yon tan don dam pa’i ngo bo nyid du rtogs pa’i ye shes la don ces bya’o.