byang chub sems dpa’i rtsom pa ji snyed pa, de dag thams cad ye shes kyis grub ste, ye shes sngon du ’gro ba, ye shes la rton pa, thams cad mkhyen pa’i ye shes la gnas pa’i phyir te;

byang chub sems dpa’i rtsom pa ji snyed pa de dag thams cad ye shes kyi tshogs kyi grub pa zhes bya ba la byang chub sems dpa’i rtsom pa ni ye shes kyi tshogs don nyung zhing bya ba nyung ba la sogs pa’i gong du smos pa rnams la bya ste, de rnams las kyang don nyung ba nas khrel yod pa dang ngo tsha shes pa’i bar du ni rgyu’i rtsom pa’o; ye shes kyi rjes su ’gro ba lhur byed pa nas brtsams te mngon sum du shes pa’i bar du ni rang bzhin gyis rtsom pa’o; yon tan gzhan la rag ma lus pa nas brtsams te las yongs su dag pa’i ye shes kyi bar du ni ’bras bu’i rtsom pa ste, ming gis smos pa’i rtsom pa de dag kun thams cad mkhyen pa’i ye shes la dmigs pa las byung ba ye shes kyi grub pa zhes bya’o. gnyis su na ye shes bsgrub pa zhes kyang bya ste, rtsom pa de dag thams cad kyis thams cad mkhyen pa’i ye shes sgrub pa’i phyir ye shes kyi tshogs so. ye shes sngon du ’gro ba ni ye shes gtso bor byed pa’o; ye shes la rton pa ni ye shes thob par bya ba’i phyir sgrub pa’am, ye shes de la rton pa’am, ye shes dang mthun par byed pa’o; thams cad mkhyen pa’i ye shes la gnas pa ni de la dmigs pa’i sgo nas gnas pa’o.