Talis habitus . talis uultus erat . cum rimarer tecum secreta naturȩ? Uuás íh in dîen uátôn . tô íh tir hálf crúnden tîa tóugeni dero naturȩ . i. phisicas questiones? Cum describeres mihi radio . i. uirga uias syderum . i. planetarum. Tô du mír bílddotôst án dero áscûn . mít tînero zéigo-rûoto . dîe uérte dero síben uuállôntôn stérnôn. Philosophi hábetôn éin brét fóre ín . dáz sîe hîezen mensam . súmeliche hîezen iz abacum . dáz uuás pezétet mínclésinemo puluere . chléino gemálnemo . únde gnôto geuéutemo . únde sâzen sie mít íro rûoto in hénde . mít téro sie íro iúngerôn án déro sélbûn áscûn píldotôn dîe uérte dero stérnôn . únde álle dîe figuras . tîe man lírnên sólin geometrica. Abacus íst éin descriptio . dáz chît éin bílde án éinemo bréte . álde an éinero pagina . sô uuír iz nû séhên in dísên zîten . târ mísseliches píldes caracteres ûf-keléget uuérdent . álso dâr man uuúrf-záueles spílôt. Mít tien caracteribus uuérdent spûotigo eruáren állero numerorum diuisiones . únde multiplicationes . souuéder man íro badárf . in musica . álde in arithmetica. Tíu disciplina héizet mathematica. Cum formares mores nostros . et rationem totius uitȩ . ad exemplar cȩlestis . i . angelici ordinis. Tô dû mîne síte . únde álla dîa uuîsûn mînes lîbes . scáffotôst nâh témo bílde dero éngelo. Uuánda dâr-úmbe chám christus dei sapientia hára in uuérlt . táz er ménnisken lêrti . in terris angelicam uitam ducere. Târ-fúre lêrtôn philosophi ȩthicam .i. morum disciplinam.