Se raison voloit a ces chosez encontre respondre et deist que vraiement regarde elle et comprent par raison de universalité et ce qui est sensible et ce qui est ymaginable, mais que ces deus, c’est assavoir sens et ymaginacion, ne se peuent pas eslever ne ataindre a cognoissance de universalité pour ce que leur cognoissance ne pourrait pas seurmonter les corporiex figurez, et que, certez, de la cognoissance des chosez on devroit miex croire au plus parfait et au plus ferme jugement – en ceste tençon donques nous qui avons force et de raisonner et de ymaginer et de sentir, c’est a dire de comprendre par raison, par ymaginacion et par sens, ne loerions nous pas miex la cause de raison ?