de nas bcom ldan ’das sṅa dro’i dus kyi tshe śam thabs daṅ chos gos gsol te | lhuṅ bzed bsnams nas dge sloṅ ñis stoṅ gis bskor ciṅ mdun du bdar te yaṅs pa’i groṅ khyer chen por bsod sñoms la gśegs nas | bcom ldan ’das kyis źabs sgo’i them pa la bźag ma thag tu saṅs rgyas bcom ldan ’das rnams groṅ khyer du gśegs pa na ṅo mtshar rmad du byuṅ ba’i chos rnams ’byuṅ bar ’gyur ba gaṅ dag yin pa de dag byuṅ ste | loṅ ba rnams ni mthoṅ bar gyur | ’on pa rnams ni thos par gyur | smyon pa rnams ni dran pa rñed par gyur to || lha’i me tog gi char yaṅ bab bo || snaṅ ba chen po yaṅ byuṅ ṅo || sraṅ yaṅ dri ma med par gyur to || lha’i sil sñan yid du ’oṅ ba dag kyaṅ ma brduṅs par grag go || mnar med pa’i sems can dmyal ba la thug pa nas ’og min gyi gnas man chad kyi sems can thams cad kyaṅ gcig tu ṅes par bde ba daṅ ldan par gyur to ||