yaṅ dge sloṅ rnams the tshom skyes nas the tshom thams cad gcod par mdzad pa saṅs rgyas bcom ldan ’das la źus pa | btsun pa tshe daṅ ldan pa dga’ (3) bos las ci źig bgyis na las de’i rnam par smin pas gal te rab tu byuṅ bar ma gyur na ’dis stobs kyis ’khor lo sgyur ba’i rgyal srid bgyis par ’gyur lags | bcom ldan ’das kyis bka’ stsal pa | dge sloṅ dag rigs kyi bu dga’ bo ’di ñid kyis las byas śiṅ (4) bsags pa tshogs rñed pa | rkyen yoṅs su bsgyur ba | dpa’ rgal bźin ñe bar gnas pa ṅes par gyur pa yin te | las byas śiṅ bsags pa rnams gźan su źig gis myoṅ bar ’gyur | dge sloṅ dag las byas śiṅ bsags pa rnams ni phyi rol gyi (5) sa’i khams la rnam par smin par mi ’gyur | chu’i khams la ma yin | me’i khams la ma yin | rluṅ gi khams la ma yin gyi | ’oṅ kyaṅ dge ba daṅ mi dge ba’i las byas pa rnams ni zin pa’i phuṅ po daṅ khams daṅ | skye mched dag kho na la rnam par smin (6) par ’gyur te | bskal pa brgya phrag rnams su yaṅ | las rnams chud zar mi ’gyur te | tshogs śiṅ dus la bab pa na | lus can rnams la ’bras bur smin | dge sloṅ dag sṅon byuṅ ba bskal pa bzaṅ po ’di ñid la skye dgu’i tshe lo ñi khri thub pa na ston pa (7) de bźin gśegs pa dgra bcom pa yaṅ dag par rdzogs pa’i saṅs rgyas rig pa daṅ źabs su ldan pa | bde bar gśegs pa | ’jig rten mkhyen pa | skyes bu ’dul ba’i kha lo sgyur ba bla na med pa | lha daṅ mi rnams kyi ston pa | saṅs rgyas bcom ldan ’das (157b1) ’od sruṅ źes bya ba ’jig rten du byuṅ ste | de groṅ khyer bā rā ṇa sī na rten ciṅ draṅ sroṅ smra ba ri dgas kyi nags na bźugs so ||

.