[Aniyata 2]
saṅs rgyas bcom ldan ’das rgyal po’i khab na ’od ma’i tshal ka lan da ka’i gnas na bźugs so || de nas dge sloṅ śi ri ka sṅa dro śam thabs bgos lhuṅ (4) bzed daṅ chos gos thogs te rgyal po’i khab tu bsod sñoms la źugs nas | mthar gyis rgyal po’i khab tu bsod sñoms rgyu ba na khyim bdag gi chuṅ ma gso sbyoṅ ’phags kyi khyim ga la ba der soṅ ṅo || khyim bdag gi chuṅ ma gso sbyoṅ ’phags kyis dge sloṅ śi ri ka thag riṅ po kho na nas (5) mthoṅ ste | mthoṅ nas kyaṅ dge sloṅ śi ri ka’i phyir stan śom par byed ciṅ ’di skad ces kyaṅ smras so || btsun pa śi ri ka tshur spyon | btsun pa śi ri ka byon pa legs so || btsun pa śi ri ka gdan bśams pa ñid la bźugs śig | dge sloṅ śi ri ka stan bśams (6) de la ’dug go || de nas khyim bdag gi chuṅ ma gso sbyoṅ ’phags kyis | dge sloṅ śi ri ka’i rkaṅ pa gñis la mgo bos phyag ’tshal te | pus mo gñis la pus mo gñis ma reg par chos mñan pa’i phyir ’dug go || dge sloṅ śi ri kas de la chos sñan pa sñan pa (7) dag bstan par brtsams so || de’i tshe na dge bsñen ma legs skyes de’i ñen kor na ’gro bas dge bsñen ma legs skyes kyis khyim bdag gi chuṅ ma gso sbyoṅ ’phags kyi khyim na dge sloṅ śi ri ka’i skad kyi gdaṅs grags pa thos so || thos nas kyaṅ de ’di sñam du sems (37b1) te | kye ma ’phags pa śi ri ka’i skad kyi gdaṅs kyis khyim bdag gi chuṅ ma gso sbyoṅ ’phags la sbraṅ bu sbraṅ rtsi ’byin pa daṅ ’dra bar chos sñan pa sñan pa dag ston par byed kyis | bdag kyaṅ gźan la brtsams pa’i chos mñan pa’i phyir ’gro’o sñam mo || de nas dge bsñen (2) ma legs skyes khyim bdag gi chuṅ ma gso sbyoṅ ’phags kyi khyim ga la der soṅ ba daṅ | dge bsñen ma legs skyes kyis khyim bdag gi chuṅ ma gso sbyoṅ ’phags dge sloṅ śi ri ka’i pus mo gñis la pus mo gñis ma reg par chos mñan pa’i phyir ’dug pa mthoṅ ṅo || mthoṅ nas (3) kyaṅ de ’di sñam du sems te | gal te khyim bdag gam | khyim bdag gi chuṅ ma’am | khyim bdag gi bu ma dad pa ’ga’ źig gis ’di mthoṅ bar gyur na ’phags pa śi ri ka ’dis khyim bdag gi chuṅ ma gso sbyoṅ ’phags daṅ lhan cig dben pa skyabs yod par ge spyod gi tshul (4) ma yin pa sdig pa’i las cuṅ źig byas sam | byed par sems so sñam du gdon mi za bar mthar thug par ’gro bar ’gyur bas de’i phyir ’di ni bdag gis bya ba yin no sñam nas | de nas dge bsñen ma legs skyes bcom ldan ’das ga la ba der soṅ ste phyin nas | bcom (5) ldan ’das kyi źabs gñis la mgo bos phyag ’tshal te mtha’ gcig tu ’dug go || mtha’ gcig tu ’dug nas bcom ldan ’das la dge bsñen ma legs skyes kyis ’di skad ces gsol to || btsun pa bdag gis khyim bdag gi mchis braṅ gso sbyoṅ ’phags kyi sdum (6) pa na ’phags pa śi ri ka’i skad kyi gdaṅs grags pa thos te | thos nas kyaṅ bdag ’di sñam bgyid de | kye ma ’phags pa śi ri ka khyim bdag gi mchis braṅ gso sbyoṅ ’phags la sbraṅ bu sbraṅ rtsi ’byin pa daṅ ’dra bar chos sñan pa sñan pa dag ston par bgyid kyis | bdag (7) kyaṅ gźan la brtsams pa’i chos mñan pa’i slad du mchi’o sñam nas bdag khyim bdag gi mchis braṅ gso sbyoṅ ’phags kyi sdum pa ga la ba der mchis pa daṅ | bdag gis khyim bdag gi mchis braṅ gso sbyoṅ ’phags dge sloṅ śi ri ka’i pus mo gñis la pus mo gñis ma reg (38a1) par mchis pa mthoṅ ṅo || mthoṅ nas kyaṅ bdag ’di sñam bgyid de | gal te khyim bdag gam | khyim bdag gi mchis braṅ ṅam | khyim bdag gi bu ma dad pa ’ga’ źig gis ’di mthoṅ bar gyur na ’phags pa śi ri ka ’dis khyim bdag gi mchis braṅ gso sbyoṅ (2) ’phags daṅ lhan cig dben pa skyabs mchis par dge sbyoṅ gi tshul ma lags pa sdig pa’i las cuṅ źig bgyis sam | bgyid par sems so sñam du gdon mi ’tshal bar mthar thug par mchis par ’gyur bas de’i slad du ’di ni bdag gi bgyi ba lags so sñam bgyid na | btsun (3) pa de’i slad du bcom ldan ’das kyis thugs brtse ba’i slad du gaṅ gis ’phags pa dag bud med kyi yul daṅ lhan cig gcig pu gcig daṅ dben pa skyabs mchis pa na stan la mchis par mi ’gyur bar ’phags pa rnams la dran par bgyi ba cuṅ źig bca’ ba mdzad na legs lags so || (4) bcom ldan ’das kyis dge bsñen ma legs skyes la caṅ mi gsuṅ bas gnaṅ ṅo || de nas dge bsñen ma legs skyes kyis bcom ldan ’das kyis caṅ mi gsuṅ bas gnaṅ bar rig nas | bcom ldan ’das kyi źabs gñis la mgo bos phyag ’tshal te stan las laṅs nas (5) soṅ ṅo || de nas bcom ldan ’das kyis byuṅ ba ’di daṅ | gleṅ gźi ’di daṅ | skabs ’di la dge sloṅ gi dge ’dun bsdu ba mdzad do || źes bya ba la sogs pa sṅa ma bźin no || saṅs rgyas bcom ldan ’das rnams ni mkhyen bźin du rmed par mdzad pa ste źes bya ba la (6) sogs pa yaṅ sṅa ma bźin te | saṅs rgyas bcom ldan ’das kyis dge sloṅ śi ri ka la rmas pa | śi ri ka khyod kyis mi mdzes pa de lta bu de byas par gyur pa bden nam | btsun pa mad do || saṅs rgyas bcom ldan ’das kyis dge sbyoṅ gi tshul ma yin pa | rjes su mthun (7) pa ma yin pa | ruṅ ba ma yin pa | tshul daṅ mthun pa ma yin pa de ni rab tu byuṅ bas bya ba ma yin no źes bya ba la sogs pas rnam par smad pa mdzad do || de nas bcom ldan ’das kyis rnam graṅs du mas rnam par smad nas dge sloṅ rnams la bka’ stsal pa | dge sloṅ dag de lta (38b1) bas na phan yon bcu yaṅ dag par gzigs pas ’dul ba la ñan thos rnams kyis bslab pa’i gźi bca’ bar bya ste źes bya ba la sogs pa sṅa ma bźin no || ṅa’i ñan thos rnams kyis ’dul ba la bslab pa’i gźi ’di ltar gdon par bya ste | yaṅ dge sloṅ gaṅ bud med kyi yul (2) daṅ lhan cig gcig pu gcig daṅ dben pa skyabs yod pa na ’dod pa byar mi ruṅ bar stan la ’dug par byed ciṅ de la gal te dge bsñen ma yid ches pa’i tshig daṅ ldan pas chos gñis po dge ’dun lhag ma’am | ltuṅ byed las chos gaṅ yaṅ ruṅ bas smras par gyur la | dge (3) sloṅ gis ’dug par khas blaṅs na chos gñis po dge ’dun lhag ma’am | ltuṅ byed las chos gaṅ yaṅ ruṅ bas byed du gźug ciṅ dge sloṅ de la dge bsñen ma yid ches pa’i tshig daṅ ldan pas chos gaṅ daṅ gaṅ gis smras par gyur pa’i chos de daṅ des dge sloṅ de byed du gźug ste de (4) yaṅ ma ṅes pa’i chos so || yaṅ dge sloṅ gaṅ źes bya ba ni śi ri ka’am gźan yaṅ de lta bu gaṅ yin pa’o || bud med kyi yul daṅ źes bya ba ni bud med daṅ gźon nu ma mi tshaṅs par spyod pa sprod pa las byuṅ ba’i chos sten nus pa daṅ ṅo || lhan cig ces bya ba ni de daṅ lhan cig (5) go || gcig pu gcig daṅ źes bya ba ni de de daṅ ṅo || dben pa źes bya ba ni gaṅ na bud med daṅ | skyes pa daṅ | ma nid gźan ’ga’ yaṅ med pa’o || skyabs yod pa na źes bya ba ni lṅas bskyabs pa ste | rtsig pas bskyabs pa daṅ | rib mas bskyabs pa daṅ | (6) yol bas bskyabs pa daṅ | thibs pos bskyabs pa daṅ | mtshan mos bskyabs pa na’o || ’dod pa byar mi ruṅ bar źes bya ba ni mi tshaṅs par spyod pa byar mi Ruṅa bar ro || stan la źes bya ba ni khri daṅ khri’u la’o || ’dug par byed ciṅ źes bya ba ni ’dom gaṅ gi naṅ (7) ma yin par rkub tshos ’jogs par byed ciṅ ṅo || de la gal te dge bsñen ma yid ches pa’i tshig daṅ ldan pas źes bya ba la | yid ches pas źes bya ba ni saṅs rgyas la mṅon par dad pa daṅ | chos daṅ dge ’dun la mṅon par dad pa daṅ | saṅs rgyas la skyabs su (39a1) soṅ ba daṅ | chos daṅ dge ’dun la skyabs su soṅ ba daṅ | saṅs rgyas la gcig tu gyur pa daṅ | chos daṅ dge ’dun la gcig tu gyur pa daṅ | saṅs rgyas la nem nur med ciṅ the tshom med pa daṅ | chos daṅ | dge ’dun daṅ | sdug bsṅal ba (2) daṅ | kun ’byuṅ ba daṅ | ’gog pa daṅ | lam la nem nur med ciṅ the tshom med pa daṅ | bden pa mthoṅ ba daṅ | ’bras bu thob pa daṅ | mṅon par rtogs pa daṅ ldan pa daṅ | gaṅ gis raṅ gi srog gi phyir yaṅ śes bźin du brdzun gyi tshig smra bar mi nus pa’o || chos (3) gñis po źes bya ba la gñis po źes bya ba ni graṅs bstan pa’o || dge ’dun lhag ma’am | ltuṅ byed las chos gaṅ yaṅ ruṅ bas źes bya ba la | dge ’dun lhag ma źes bya ba ni bcu gsum po dag las gaṅ yaṅ ruṅ bas so || ltuṅ byed ces bya ba ni dgu bcu po dag las gaṅ (4) yaṅ ruṅ bas so || ’di ltar dge bsñen ma yid ches pa’i tshig daṅ ldan pa ni ltuṅ ba la mi mkhas pa daṅ | ltuṅ ba’i gleṅ gźi la mi mkhas pa daṅ | ltuṅ ba kun nas sloṅ ba la mi mkhas pa yin pas ’di ltar des dge sloṅ mi’i chos bla ma smra ba’am | bud med kyi yul daṅ lhan (5) cig stan gcig la | lus kyis reg par byed pa’am | snod gcig tu za bar byed pa’am | phor bu gcig tu myos par ’gyur pa’i btuṅ ba sna tshogs ’thuṅ ba’am | sa rko ba’am | rtswa sṅon po gcod pa’am | dus ma yin par za ba daṅ | gźan yaṅ raṅ bźin daṅ bcas (6) pa’i kha na ma tho ba daṅ bcas pa’i las gaṅ byed par mthoṅ ba de dag las gaṅ khas blaṅs pa de byed du gźug pa’o || byed du gźug ces bya ba ni ’chags su gźug pa’o || de yaṅ ma ṅes pa’i chos so źes bya ba ni de yaṅ rnam par ma bźag pa’i chos yin pa’o || ltuṅ ba (7) rnam par bźag pa daṅ | de’i ṅo bo ñid tshol du gźug pa’i sbyin pa daṅ | de’i ṅo bo ñid tshol du gźug pa byin pa’i kun tu spyod pa’i chos dag ni sṅa ma bźin du śes par bya’o || ma ṅes pa’i chos gñis rdzogs s+ho || ||

.