[Naiḥsargika 6]
saṅs rgyas bcom ldan ’das mñan yod na rgyal byed kyi tshal mgon med zas sbyin gyi kun dga’ ra ba na bźugs so || mñan (4) yod na khyim bdag cig ’dug pa des rigs mñam pa las chuṅ ma blaṅs te | de de daṅ lhan cig rtse bar byed | dga’ bar byed | dga’ mgur spyod par byed pa des chuṅ ma la smras pa | bzaṅ mo kho bo zoṅ thogs te yul gźan du ’gro’o || rje’i sras re źig gźon pa’i gnas (5) skabs su rol pa daṅ | dgyes pa daṅ | dgyes mgur spyod pa mdzod la | bgres pa’i gnas skabs su nor sgrub par mdzod cig | bzaṅ mo ji tsam du gźon pa’i ’byuṅ ba chen po dag ni graṅ ba daṅ | dro ba bzod pa yin pas je nor bsgrub par bya źiṅ | rgas pa’i gnas skabs su (6) bde ba spyad ciṅ ’dug par bya’o || chuṅ mas bsams pa | bdag gis bskul bar bya ba gaṅ yin pa de raṅ ñid byed do sñam nas smras pa | rje’i sras de ltar mdzod cig | khyim bdag des chuṅ ma de la kha zas tsam byin nas zoṅ khyer te yul gźan du soṅ ṅo || de’i chuṅ (7) ma des bsams pa | bdag gi khyim thab graṅ ba na graṅ bas sbrebs bźin pa daṅ | tsha ba na tsha bas gduṅs bźin pa daṅ | bkres pa daṅ | skom pas gnod bźin pa daṅ | śa sbraṅ daṅ | sbraṅ bu daṅ | rluṅ daṅ | ñi ma daṅ | sdig sbrul gyi reg pa dag gis ñen (103a1) bźin du loṅs spyod dag mṅon par bsgrub pa’i phyir spro bar byed | ’bad par byed | rtsol bar byed pa gaṅ yin pa de dag thams cad bdag gi phyir bya’o sñam pa yin pas bdag las med par ’dug pa ni bdag gi tshul daṅ mthun pa ma yin no sñam nas | des tshoṅ (2) dus su soṅ ste ras bal bzaṅ po blaṅs nas dog pa bzaṅ po bkal te | tha ga pa mkhas pa la ras zuṅ bzaṅ po ’thag tu bcug nas | des ras de spos sna tshogs kyis bsgos te gos kyi za ma tog tu bcug ste bźag go || khyim bdag des kyaṅ don legs par grub nas khe (3) spogs rñed de legs par ’oṅs nas chuṅ ma des khyim bdag de khrus byas nas de la ras zuṅ de phul lo || khyim bdag des bsams pa | bdag gis ’di la kha zas tsam bźag pa gaṅ yin pa de dag thams cad kyis kyaṅ ras zuṅ ’di mi rñed do sñam du rig nas chuṅ ma la smras pa | (4) bzaṅ mo ras zuṅ ’di ga las rñed | rje’i sras je gsol cig | khyim bdag des de gyon nas yaṅ smras pa | bzaṅ mo ras zuṅ ’di ga las rñed | rje’i sras je bśos mnobs śig | des zan zos nas yaṅ dris pa | bzaṅ mo ras zuṅ ’di ga las rñed | des skabs (5) de rgyas par brjod pa daṅ | khyim bdag gis smras pa | bzaṅ mo legs so || kho bo ni sgrub pa yin la | khyod kyaṅ ’di ltar sbed pa yin na | bdag cag gi loṅs spyod dag riṅ po mi thogs pa kho nar ’phel źiṅ rgyas pa daṅ | yaṅs par ’gyur ro || chuṅ mas smras pa | (6) rje’i sras ’di ni bdag gis dka’ bas bsgrubs pa lags kyis | khyod kyis su la yaṅ ma stsol cig | khyim bdag de dad pa daṅ ldan pa | bzaṅ ba | dge ba’i bsam pa can yin pas de bcom ldan ’das kyi źabs la phyag ’tshal du rgyal byed kyi tshal du byuṅ ste ’gro ba na mi sgo bas (7) mthoṅ nas des bsams pa | khyim bdag ’di ras zuṅ ’di lta bu gyon pa las na ’dis ni rñed pa maṅ po rñed pa yin no sñam mo || drug sde dag gi kun du spyod pa ni drug sde dag las gaṅ yaṅ ruṅ bas rgyal byed kyi tshal gyi sgo stoṅ bar mi ’jog pas ñe dga’ rgyal byed kyi tshal gyi sgo na ’chag (103b1) ciṅ ’dug pa des khyim bdag de mthoṅ nas bsams pa | khyim bdag ’di ras zuṅ ’di lta bu gyon pa las na ’dis ni rñed pa maṅ po rñed pa yin gyis | gal te bdag gis ’di ma phrogs na ñe dga’ źes bya ba’i miṅ mi gzuṅ ṅo sñam nas des de la smras pa | khyim bdag ’oṅs pa (2) legs so || ’oṅs ba legs so || khyod yun riṅ mo riṅ mo nas zla ba bźin du ga las ’khor ’khor | ’phags pa bdag zoṅ thogs te yul gźan du mchis par gyur to || khyim bdag khyod kyis rñed pa maṅ po grub bam | ’phags pa cuṅ zad tsam mo || khyim bdag mtshe’u (3) ni rñog ma can nam | dad pa’i rgyu mthun pas rig par bya ste | khyod ras zuṅ ’di lta bu gyon pa las na khyod kyis rñed pa maṅ po grub par mṅon gyis tshur śog | chos bstan par bya’o || drug sde dag gi kun tu spyod pa ni gal te tshul khrims kyi gtam dag byed na ñan pa po dag bdag (4) cag lha rnams su skyes so sñam du sems la | gal te sbyin pa’i gtam byed na ñan pa po dag raṅ gi śa gaṅ yin pa de yaṅ bcad ciṅ bcad ciṅ sbyin par bya’o sñam du sems so || gal te ṅan soṅ gi gtam dag byed na ñan pa po dag bdag cag ṅan soṅ rnams su skyes so sñam du (5) sems par ’gyur ba yin no || khyim bdag des ñe dga’i rkaṅ pa gñis la phyag ’tshal te chos mñan pa’i phyir mdun du ’dug pa daṅ | ñe daga’asa de la chos bstan par brtsams nas | des de la ci nas kyaṅ de’i sems dad par ’gyur ba de ltar chos kyi gtam byas so || de dad (6) par gyur nas smras pa | bdag gis ’phags pa la legs par gsuṅs pa’i na bza’ phrugs gcig ’bul lo || bźin bzaṅs a rog gya | sbyin pa ’dis khyod sems kyi rgyan daṅ | sems kyi yo byad daṅ | rnal ’byor gyi tshogs daṅ | don gyi mchog daṅ | lha rnams kyi gos (7) dag thob par gyur cig | bźin bzaṅs bcom ldan ’das kyis kyaṅ ’di skad ces | saṅ dag ’chi yaṅ su śes kyis || de riṅ ñid du brtul te bya || ’chi bdag sde chen de daṅ ni || khyed cag bśes pa ma yin no || źes gsuṅs kyis | bźin bzaṅs khyod kyis ras zuṅ (104a1) bzaṅ po gyon pa ’di ñid kho bo la byin cig daṅ | kho bos ’di las snam sbyar ñi rim byas te sems las chuṅ dus dge ba’i phyogs la bde bar tron bya’o || ’phags pa khyod ’di bźed dam | lha’i gnas kyi lhag ma ji lta ba bźin du’o || ’phags pa (2) bdag khyod la mi ’bul ba ni ma lags na | ’di ltar ’di ni mchis braṅ gis bdag la stsal ba lags so || khyim bdag kho bos khyod gźan la dad par byas na khyod ko bud med kho na’i dbaṅ yin nam | źes ñe daga’asa daṅ na dus kyi phyed kyis de’i bla gos blaṅs nas de lag pa (3) gñis ’dril bar byed | bźin sgyur bar byed do || khyim bdag gis de la smras pa | ’phags pa ’di ci’i tha tshig khyim bdag ’di ni khyod la yoṅs su btaṅ ba las byuṅ ba’i bsod nams bya ba’i gźi ni yod na yoṅs su loṅs spyod pa las byuṅ ba’i bsod nams bya ba’i gźi ni (4) med de | nam źig na ’di daṅ ’dra ba rñed na ’di las chos gos byed par ’gyur bas ’di chos gos kyi gdaṅ kho na la zad par ’gyur ro || ’phags pa ci bdag sgren mor mchi bar bgyi’am | khyim bdag khyod la gos gyon pas ci źig bya | tshul khrims daṅ | rigs (5) daṅ | spyod pa gyon pas chog mod | gcer bu la ṅo tsha śes pa daṅ | khrel yod pa ñams pa de dag ni sgren mor ’gro na mi sdug pa yin gyi khyod lta bu ṅo tsha śes pa daṅ | khrel yod pa daṅ ldan pa la sgren mor ’gro ba mi sdug pa ci yod | khyim bdag khyod dor thuṅ mi gyon (6) nam | ’phags pa ’tshal lo || khyim bdag khyim bdag rnams kyi kun du spyod pa ni dor thuṅ gyon te śiṅ tshal thogs nas | ba laṅ gi phyi bźin ’gro ba yin pas khyod kyaṅ śiṅ tshal thogs la | ba laṅ gi phyi bźin soṅ śig daṅ | skye bo dag gis pa laṅ sur ’gro (7) ba phyir byuṅ ba źig yin par śes par ’gyur ro || źes ñe daga’asa dṅan dus kyi phyed kyis de’i smad g-yogs kyaṅ blaṅs so || khyim bdag de śiṅ tshal pa thogs te ba laṅ gi phyi bźin źugs pa daṅ | mi sgo bas mthoṅ nas smras pa | khyim bdag kho bos da ci kho na khyod chen (104b1) po la ’os pa’i ras zuṅ gyon par mthoṅ na | ci de dag chom rkun pa dag gis bcom mam | bźin bzaṅs kho bo chom rkun pa dag gis ni ma bcom mod kyi | ’di ltar btsun pa ñe daga’asa kha’i chos kyis bcom mo || khyim bdag mgon med zas sbyin gyi kun du spyod pa ni naṅ par naṅ (2) bar sṅar laṅs te ’khor lṅa brgya daṅ lhan cig bcom ldan ’das daṅ | dge sloṅ gnas brtan gnas brtan rnams kyi źabs la phyag ’tshal du ’gro ba yin pas khyim bdag mgon med zas sbyin naṅ par sṅaRa laṅs te ’khor lṅa brgya daṅ lhan cig mñan yod nas byuṅ ste ’gro ba mi sgo bas (3) mthoṅ nas des smras pa | khyim bdag khyod kyis don mthun maṅ du khrid de ’oṅs kyis ci nas kyaṅ mi choms par bag gyis śig | kye naṅ rje rgyal byed kyi tshal daṅ lam gyi bar na chom rkun pa dag ’khod dam ci | lam gyi bar na ma yin gyi rgyal byed kyi tshal ñid na ’khod do || kye naṅ rje khyod (4) ni bal gyi rigs nag po daṅ ’dra ste | sgo ’di nas bcom ldan ’das daṅ | dge sloṅ gnas brtan gnas brtan dag gśegs ba gaṅ gis kyaṅ khyod dkar por mdzad ma spyod do || bcom ldan ’das daṅ dge sloṅ gnas brtan gnas brtan rnams kyi źabs kyi rdul ni bdag gis (5) mgos blaṅ ba yin na | khar tsaṅ gi ñin mo khyim bdag cig chen po la ’os pa’i ras zuṅ gyon te byuṅ ba de’i ras de ñe daga’asa kha’i chos kyis phrogs nas khyim bdag de smod ciṅ dor thuṅ gis źugs par gyur to || de nas khyim bdag mgon med zas sbyin ’di sñam du sems te | (6) de ni bdag gi bya ba yin no sñam nas rgyal byed kyi tshal du soṅ ba daṅ | ñe daga’asa mthoṅ nas smras pa | khyim bdag a rog gya | khyim bdag gis smras pa | a rog mi gya yaṅ ruṅ ṅo || khyim bdag khyod kho bo la sṅan chad du ba ’thul na da ci me kha nar ’bar ro || kho bo (7) mer mi ’bar du ji ltar ruṅ | gźan dag rab tu byuṅ ba ni ’dod pa spaṅs pa’i phyir yin na btsun pa ñe dga’ ni ’dod pa mṅon par spel ba’i phyir kho nar yin no || kho bos ci byas | khyod kyis khyim bdag cig rgyal byed kyi tshal ltar ’oṅs pa de’i ras zuṅ daṅ na dus kyis phrogs (105a1) nas khyim bdag de smod par mi byed dam | ñe daga’asa smras pa | de ni ’jig rten na lha ni sbyin par byed la yi dgas ni zlog par byed do źes zer ba yin no || ci des khyod la ril ba b+h+r-iṅa gar thogs te phul lam | khyim bdag gal te mi bzod na bslab pa’i gźi (2) ’char chug śig | ci kho bos de yal bar bor du re’am | de nas khyim bdag mgon med zas sbyin bcom ldan ’das ga la ba der soṅ ste phyin nas bcom ldan ’das kyi źabs gñis la mgo bos phyag ’tshal te mtha’ gcig tu ’dug go || mtha’ gcig tu ’dug nas bcom ldan (3) ’das la khyim bdag mgon med zas sbyin gyis ’di skad ces gsol to || btsun pa ’phags pa ’di dag khyim bdag gam khyim bdag gi mchis braṅ ñe du ma lags pa las gos sloṅ bar bgyid na | kye ma bcom ldan ’das kyis gaṅ gis ’phags pa dag khyim bdag gam | (4) khyim bdag gi mchis braṅ ñe du ma lags pa las gos sloṅ bar mi ’gyur bar ’phags pa rnams la dran par bgyi ba cuṅ źig bca’ bar mdzad pa’i rigs so || bcom ldan ’das kyis khyim bdag mgon med zas sbyin la caṅ mi gsuṅ bas gnaṅ ṅo || de nas khyim bdag mgon med (5) zas sbyin gyis bcom ldan ’das kyis caṅ mi gsuṅ bas gnaṅ bar rig nas stan las laṅs te | bcom ldan ’das kyi źabs gñis la mgo bos phyag ’tshal te | bcom ldan ’das kyi spyan sṅa nas soṅ ṅo || de nas bcom ldan ’das kyis byuṅ ba ’di daṅ | gleṅ gźi ’di daṅ | (6) skabs ’di la dge sloṅ gi dge ’dun bsdu ba mdzad do źes bya ba la sogs pa sṅa ma bźin no || saṅs rgyas bcom ldan ’das rnams ni mkhyen bźin du rmed par mdzad pa ste źes bya ba la sogs pa yaṅ sṅa ma bźin te | saṅs rgyas bcom ldan ’das kyis ñe dga’ la rmas pa | ñe (7) dga’ khyod kyis khyim bdag gam | khyim bdag gi chuṅ ma ñe du ma yin pa las gos bslaṅs pa bden nam | btsun pa mad do || saṅs rgyas bcom ldan ’das kyis dge sbyoṅ gi tshul ma yin pa | rjes su mthun pa ma yin pa | ruṅ ba ma yin pa | tshul daṅ mthun pa ma yin (105b1) pa de ni rab tu byuṅ bas bya ba ma yin no źes rnam par smad pa mdzad do || de nas bcom ldan ’das kyis rnam graṅs du mas rnam par smad nas dge sloṅ rnams la bka’ stsal pa | dge sloṅ dag de lta bas na phan yon bcu yaṅ dag par gzigs pas ’dul ba la ñan thos rnams kyi (2) bslab pa’i gźi bca’ bar bya ste źes bya ba la sogs pa sṅa ma bźin no || ṅa’i ñan thos rnams kyis ’dul ba la bslab pa’i gźi ’di ltar gdon par bya ste | yaṅ dge sloṅ gaṅ khyim bdag gam khyim bdag gi chuṅ ma ñe du ma yin pa’i gan du soṅ ste gos sloṅ na spaṅ ba’i ltuṅ byed (3) do źes bcom ldan ’das kyis ’dul ba la ñan thos rnams kyi bslab pa’i gźi de ltar bca’ bar mdzad do || || ’dul ba rnam par ’byed pa | bam po sum bcu pa | saṅs rgyas bcom ldan ’das mñan yod na rgyal byed kyi tshal mgon med zas sbyin gyi kun dga’ ra ba na (4) bźugs so || groṅ phreṅ ba can pa’i dge sloṅ bźi bcu don mthun pa daṅ lhan cig ljoṅs rgyu źiṅ ’doṅ ba na chom rkun pa dag gis bcom nas de dag ’di sñam du sems te | bcom ldan ’das kyis yaṅ dge sloṅ gaṅ khyim bdag gam khyim bdag gi chuṅ ma ñe du ma yin pa’i gan du soṅ (5) ste gos sloṅ na spaṅ ba’i ltuṅ byed do || źes bslab pa’i gźi bca’ bar mdzad pas ’di na bdag cag la ñe du ’ga’ yaṅ med kyis bdag cag mñan yod du soṅ na der bdag cag la tshaṅs pa mtshuṅs par spyod pa rnams kyis gos dag gis bgo bśa’ byed par ’gyur ro sñam nas | (6) de dag gis smras pa | ci bdag cag sgren mor ’doṅ bar bya’am | mtshan mo ’gebs pas ’doṅ bar bya źiṅ ñin mo tshaṅ tshiṅ gi naṅ du źugs te ’khod la mtshan mo lam du ’jug par bya’o źes de dag mtshan mo ’gebs pas rgyal byed kyi tshal du doṅ ba daṅ | dge sloṅ nam gyi cha stod (7) daṅ nam gyi cha smad la mi ñal bar sbyor ba’i rjes su brtson pa dag gis de dag mthoṅ nas smras pa | gcer bu sgre byi dag ’di khyed kyi ’dug gnas kyaṅ ma yin | gtsug lag khaṅ yaṅ ma yin na khyed ga las ’oṅs | tshe daṅ ldan pa dag bdag cag ni gcer bu pa ma yin no || ’o na (106a1) khyed cag su yin dge sloṅ dag go dge sloṅ ’di lta bu yod dam | gaṅ dag chom rkun pa dag gis bcom pa dag ci ’dra ba yin khyed cag miṅ ci groṅ phreṅ ba can de’i dge sloṅ bźi bcu’o || tshe daṅ ldan pa dag ’oṅs pa legs so ’oṅs pa legs so źes de (2) dag gis de dag la la las ni snam sbyar byin la las ni bla gos byin la las ni mthaṅ gos byin | la las ni rdul gzan byin pa’i skabs de dge sloṅ rnams kyis bcom ldan ’das la gsol pa daṅ | bcom ldan ’das kyis bka’ stsal pa | de lta bas na dus ma gtogs te | (3) de la dus ni ’di yin te | dge sloṅ gos phrogs sam | gos rlag gam | gos tshig gam | gos rluṅ gis khyer ram | gos chus khyer na de la de ni dus yin no || de nas bcom ldan ’das kyis bslab pa ’dod pa daṅ | bslab pa la gus pa daṅ | bslab pa la yo byad (4) bsñuṅs pa’i bsṅags pa brjod nas | dge sloṅ rnams la yaṅ de daṅ mthun pa daṅ | de’i śas che ba daṅ de daṅ ldan pa’i chos daṅ mthun pa’i bka’ mchid mdzad nas dge sloṅ rnams la bka’ stsal pa | dge sloṅ dag de lta bas na sṅa ma ni bcas pa yin la | ’di ni gnaṅ (5) ba yin te | ṅa’i ñan thos rnams kyis ’dul ba la bslab pa’i gźi ’di ltar gdon par bya ste | yaṅ dge sloṅ gaṅ khyim bdag gam khyim bdag gi chuṅ ma ñe du ma yin pa’i gan du soṅ ste gos sloṅ na dus ma gtogs te spaṅ ba’i ltuṅ byed do || de la dus ni ’di yin te | dge (6) sloṅ gos phrogs sam | gos rlag gam | gos tshig gam | gos rluṅ gis khyer ram | gos chus khyer na de la de ni dus yin no || yaṅ dge sloṅ gaṅ źes bya ba ni ñe daga’a’ama gźan yaṅ de lta bu gaṅ yin pa’o || khyim bdag gam źes bya ba ni skyes pa’o || khyim bdag (7) gi chuṅ ma źes bya ba ni bud med do || ñe du ma yin pa’i źes bya ba ni phyi mo daṅ | mes po daṅ | phrugs kyi bdun pa tshun chad ni ñe du yin la | de phan cad ni ñe dum yin no || gan du soṅ ste źes bya ba ni druṅ du soṅ ste’o || gos źes bya ba ni bdun po bal gos daṅ | śa na’i (106b1) gos daṅ | zar ma’i gos daṅ | ras bal gyi gos daṅ | du gu la’i gos daṅ | ko tam pa’i gos daṅ | ñi ’og gi gos las gaṅ yaṅ ruṅ ba’o || sloṅ na źes bya ba ni sloṅ mo byed na’o || dus ma gtogs te źes bya ba ni dus bźag ste’o || spaṅ ba’i ltuṅ byed do źes (2) bya ba ni dṅos po de spaṅs nas ltuṅ byed kyi ltuṅ ba bśags par bya’o || de la dus ni ’di yin te | dge sloṅ gos phrogs sam | źes bya ba ni ’di lta ste | dge sloṅ gi gos dag chom rkun pa dag gam | g-yon can dag gis phrogs par gyur pa’o || gos rlag gam źes (3) bya ba ni ’di lta ste | dge sloṅ gi gos dag rlag par gyur ba’am | ’khyams par gyur pa’o || gos tshig gam źes bya ba ni ’di lta ste | dge sloṅ gi gos dag mes tshig par gyur pa’o || gos rluṅ gis khyer ram źes bya ba ni ’di lta ste | dge sloṅ gi gos dag rluṅ gis khyer (4) bar gyur pa’o || gos chus khyer na źes bya ba ni ’di lta ste | dge sloṅ gi gos dag chus khyer bar gyur pa’o || de la ltuṅ bar ji ltar ’gyur źe na | rin thaṅ daṅ | kha dog daṅ | khru tshad las te | ji ltar rin thaṅ las źe na | dge sloṅ gi gos kār ṣā pa ṇa lṅa ri ba sloṅ (5) bar byed ciṅ | des kār ṣā pa ṇa lṅa ri ba’i gos thob na de sloṅ ba la ñes byas su ’gyur la | thob na spaṅ ba’i ltuṅ byed du ’gyur ro || kār ṣā pa ṇa lṅa ri ba ji lta ba de bźin du kār ṣā pa ṇa bcu ri ba daṅ | kār ṣā pa ṇa bcwa lṅa ri ba daṅ | kār ṣā pa ṇa ñi śu ri ba daṅ | kār ṣā pa ṇa lṅa (6) bcu ri ba’i bar gyi gos sloṅ bar byed ciṅ | des kār ṣā pa ṇa lṅa bcu ri ba’i gos thob na de sloṅ ba la ñes byas su ’gyur la | thob na spaṅ ba’i ltuṅ byed du ’gyur ro || dge sloṅ gis kār ṣā pa ṇa lṅa ri ba’i gos sloṅ bar byed ciṅ lhag pa thob na de sloṅ ba la ñes byas su ’gyur la | (7) lhag pa thob na ltuṅ ba med do || kār ṣā pa ṇa lṅa ri ba ji lta ba de bźin du kār ṣā pa ṇa bcu rib daṅ | kār ṣā pa ṇa bcwa lṅa ri ba daṅ | kār ṣā pa ṇa ñi śu ri ba daṅ | kār ṣā pa na lṅa bcu’i bar ri ba’i gos sloṅ źiṅ lhag pa thob na de sloṅ ba la ñes byas su ’gyur la | lhag (107a1) pa thob na ltuṅ ba med do || de ltar rin thaṅ las so || ji ltar kha dog las źe na | dge sloṅ gis gos sṅon po sloṅ bar byed ciṅ des gos sṅon po thob na de sloṅ ba la ñes byas su ’gyur la | thob na spaṅ ba’i ltuṅ byed du ’gyur ro || sṅon po ji lta ba de (2) bźin du ser po daṅ | dmar po daṅ | gos stug po daṅ | srab mo sloṅ bar byed ciṅ | des srab mo thob na sloṅ ba la ñes byas su ’gyur la | thob na spaṅ ba’i ltuṅ byed du ’gyur ro || dge sloṅ gis gos sṅon po sloṅ bar byed pa na ser po thob na | sṅon po sloṅ ba de la ñes byas su (3) ’gyur la | ser po thob pa la ltuṅ ba med do || sṅon po sloṅ ba la ji lta ba de bźin du ser po daṅ | dmar po daṅ | stug po daṅ | srab mo sloṅ ba na stug po thob na | srab mo sloṅ ba de la ñes byas su ’gyur la | goṅ ma thob pa la ltuṅ ba med de | de ltar kha dog las (4) so || ji ltar khru tshad las źe na | dge sloṅ gis gos khru lṅa pa sloṅ bar byed ciṅ | des gos khru lṅa pa thob na | de sloṅ ba la ñes byas su ’gyur la | thob na spaṅ ba’i ltuṅ byed du ’gyur ro || khru lṅa pa ji lta ba de bźin du khru bcu pa daṅ | khru bcwa lṅa pa daṅ | khru (5) ñi śu pa daṅ | khru lṅa bcu pa’i bar gyi gos sloṅ bar byed ciṅ | gos khru lṅa bcu pa thob na | de sloṅ ba la ñes byas su ’gyur la | thob na spaṅ ba’i ltuṅ byed du ’gyur ro || dge sloṅ gis gos khru lṅa pa sloṅ ba na lhag pa thob na | khru lṅa pa sloṅ ba de la ñes byas su (6) ’gyur la | lhag pa thob pa la ltuṅ ba med do || khru lṅa ba ji lta ba de bźin du khru bcu pa daṅ | khru bcwa lṅa pa daṅ | khru ñi śu pa daṅ | khru lṅa bcu pa’i bar gyi gos sloṅ bar byed ciṅ | des gos khru lṅa bcu pa sloṅ bar byed pa na lhag pa thob na gos khru lṅa bcu pa sloṅ bar byed pa (7) de la ñes byas su ’gyur la | lhag pa thob pa la ltuṅ ba med de | de ltar khru tshad las so || ras ma sloṅ na kha tshar thob pa daṅ | kha tshar sloṅ ba na ras ma thob pa daṅ | ras ma sloṅ ba na ras yug chen daṅ | ras yug phran thob pa la ltuṅ ba med do || las daṅ po pa (107b1) daṅ | smyos pa daṅ | sems ’khrugs pa daṅ | tshor bdag gis ñen pa la ltuṅ ba med do || sloṅ ba’i spaṅ ba ste drug pa rdzogs s+ho || ||

.