[Pāyantika 66]
saṅs rgyas bcom ldan ’das mñan yod na rgyal (6) byed kyi tshal mgon med zas sbyin gyi kun dga’ ra ba na bźugs so || gaṅ gi tshe tshe daṅ ldan pa mod gal gyi bu chen pos ñe ba ’khor la sogs pa sar pa skyes phran gźon nu bcu bdun sde’i tshogs dag rab tu phyuṅ rdzogs par bsñen par byas pa de’i tshe na de dag drug sde (7) dag la sten par byed | sñen par byed | bsñen bkur byed do || de nas ’char kas de dag la smras pa | bcu bdun sde dag tshur śog ’di daṅ ’di gyis śig | de dag gis smras pa | khyod kho bo cag gi slob dpon nam | mkhan po yin nam ci | mi byed do || (269b1) ’char kas smras pa | glen pa dag ’o na gźan ci byed ces des de dag gña’ ba dag nas bzuṅ ste bskrad do || de dag gis smras pa | tshe daṅ ldan pa dag bdag cag drug sde dag gis gaṅ cuṅ zad brñas par gyur pa de dag thams cad ni bdag cag thos pa ñuṅ ba las gyur pa (2) yin gyis bdag cag thos pa ’dzin du ’doṅ daṅ | des na phyin cad drug sde dag la cuṅ zad kyaṅ dri bar mi bya’o || źes de dag dge sloṅ źig gi gan du doṅ ste smras pa | btsun pa bdag cag klog tu stsol cig | des de dag la thabs yin no źes smras nas de dag gis (3) de las bklag par brtsams so || ñe dga’ sa smras pa | btsun pa ’char ka bcu bdun sde dag de bar bdag cag la sten par mi byed | sñen par mi byed do || bsñen bkur mi byed do || ’char kas smras pa | de dag kho bos bskrad nas thos ba ’dzin par (4) brtsams so || btsun pa ’char ka khyod kyis bdag cag gi sbrul ñal ba lcag gis gźus so || ji srid du glen pa de dag thos pa ñuṅ bar gyur pa de srid du de dag bdag cag la sten par byed | sñen par byed | bsñen bkur byed kyi | gaṅ gi tshe de dag maṅ du thos (5) par gyur ciṅ mdo sde ’dzin pa daṅ | ’dul ba ’dzin pa daṅ | ma mo ’dzin pa daṅ | gdug ciṅ pha rol gnon par gyur pa de’i tshe na de dag bdag cag la gnod pa bya bar sems par ’gyur ro || ’char kas smras pa | kho bos ci nas kyaṅ de dag gis (6) ma rtogs pa yaṅ rtogs par mi ’gyur źiṅ || rtogs pa las kyaṅ yoṅs su nams par ’gyur ba de ltar bya’o || bcu bdun sde dag me khaṅ du mar me btsugs te kha ton bya bar brtsams pa daṅ | ji tsam na tshe daṅ ldan pa ’char ka la ba źig spu phyir (7) bstan te gyon nas me khaṅ du źugs te mar me bsad nas ’byuṅ po’o źes smras pa daṅ | de dag sṅaṅs śiṅ skrag nas me khaṅ nas phyir byuṅ ste mtha’ gcig tu ’khod do || de dag slob dpon gyis mthoṅ nas des smras pa | gźon nu dag (270a1) ci’i phyir kha ton mi byed par kha rog ste ’khod | de dag gis smras pa | slob dpon bdag cag mi ma lags pas gtses so || des bsams pa | rgyal byed kyi tshal gnod sbyin gos sṅon po gyon pa lṅa brgyas rtag tu mi stoṅ bas ’di na mi ma yin pa (2) yod re skan | lhuṅ bzed nag po can gnas ṅan len kun du spyod pa ’ga’ źig gis ’di dag bsdigs so sñam nas | des smras pa | gźon nu dag khyod cag mi ma yin pa de ’dzin par ’dod dam | de dag gis smras pa | ’tshal lo || des smras pa | gźon nu (3) dag me khaṅ gi grwa bźir mar me btsugs te rdza mas khob la dbus su mar me btsugs te kha ton gyis śig daṅ | gal te de ’oṅs te dbus kyi mar me bsad nas ’byuṅ po’o ’byuṅ po’o źes zer ba na sgo chod la me khaṅ gi phye la zuṅ śig | de (4) dag gis de ltar byas pa daṅ ji tsam na tshe daṅ ldan pa ’char ka la ba źig spu phyir bstan te gyon nas me khaṅ du źugs te dbus kyi mar me bsad nas ’byuṅ po’o ’byuṅ po’o || źes smras pa | de dag gis sgo bcad nas me khaṅ gi grwa bźi’i mar me phye ste bzuṅ nas (5) brdeg par brtsams pa daṅ | des smras pa | ’char ka’o ’char ka’o || de dag gis smras pa | khyod kyi sñiṅ lam na ’char ka kho bo cag gi grogs yin pas de yin no źes byas na btaṅ bar ’gyur sñam mam | śi drod kyis ma bzuṅ gi bar du mi gtoṅ ṅo || (6) de dag gis smras pa | tshe daṅ ldan pa dag mi ma yin pa ni śin tu chen po źig bsad kyaṅ ñes pa sbom por ’gyur bar zad pas bdag cag gis ltuṅ ba mthol źiṅ bśags par byas | te por brdeg go źes de dag gis te por gtal gtal te btaṅ (7) nas | ’char ka ’phyes ’khrud de raṅ gi gnas su phyin nas | de phyi de ñin par lus dag ’bru mar gyis bsku mñe byas nas khyi la ñal źiṅ ’dug pa daṅ | dge sloṅ rnams kyis de la smras pa | tshe daṅ ldan pa ’char ka khyod ci ñes | ’char kas smras (270b1) pa | tshe daṅ ldan pa dag kho bos ku re cuṅ źig byas na ñes dmigs ’di lta bu byuṅ bar gyur to || ci byas | des skabs de rgyas par brjod pa daṅ || dge sloṅ rnams kyis de la smras pa | khyod dge sloṅ la sṅaṅs par byed du ruṅ ṅam | gaṅ gi phyir mi ruṅ ba de ñid kyi (2) phyir ñes dmigs ’di lta bu byuṅ bar gyur to || dge sloṅ don ñuṅ ṅu dag ci’i phyir dge sloṅ dag dge sloṅ la sṅaṅs par byed ces smod par byed | phyar ka gtoṅ bar byed | ka zer bar byed pa’i skabs de dge sloṅ rnams kyis bcom ldan ’das la gsol to || (3) de nas bcom ldan ’das kyis byuṅ ba ’di daṅ | gleṅ gźi ’di daṅ | skabs ’di la dge sloṅ gi dge ’dun bsdu ba mdzad do źes bya ba la sogs pa sṅa ma bźin no || saṅs rgyas bcom ldan ’das rnams ni mkhyen bźin du rmed par mdzad pa ste | źes bya ba la (4) sogs pa yaṅ lṅa ma bźin te | saṅs rgyas bcom ldan ’das kyis tshe daṅ ldan pa ’char ka la rmas pa | ’char ka khyod dge sloṅ la sṅaṅs par byed pa bden nam | btsun mad do || saṅs rgyas bcom ldan ’das kyis dge sbyoṅ gi tshul ma yin pa | rjes su mthun (5) pa ma yin pa | ruṅ bam yin pa | tshul daṅ mthun pa ma yin pa de ni rab tu byuṅ bas bya ba ma yin no źes rnam par smad pa mdzad do || de nas bcom ldan ’das kyis rnam graṅs du mas rnam par smad nas dge sloṅ rnams la bka’ stsal pa | dge sloṅ dag de lta bas na (6) phan yon bcu yaṅ dag par gzigs pas ’dul ba la ñan thos rnams kyi bslab pa’i gźi bca’ bar bya ste źes bya ba la sogs pa sṅa ma bźin no || ṅa’i ñan thos rnams kyis ’dul ba la bslab pa’i gźi ’di ltar gdon par bya ste | yaṅ dge sloṅ gaṅ dge sloṅ (7) la sṅaṅs par byed dam | sṅaṅs par byed du ’jud na tha na bźad gad bya bar bsams kyaṅ ruṅ ste ltuṅ byed do || yaṅ dge sloṅ gaṅ źes bya ba ni ’char ka ’am | gźan yaṅ de lta bu gaṅ yin pa’o || dge sloṅ la źes bya ba ni chos ’di ba la’o || sdaṅs par byed (271a1) dam źes bya ba ni bdag ñid kyis so || sdaṅs par byed du ’jud na źes bya ba ni gźan no || tha na bźad gad bya bar bsams kyaṅ ruṅ ste źes bya ba ni tha na ku re bya bar bsams kyaṅ ruṅ ste’o || ltuṅ byed do źes bya ba ni sems can dmyal ba daṅ | dud ’gro daṅ | (2) yi dgas ṅan soṅ daṅ || ṅan ’gro daṅ | log par ltuṅ ba dag tu sreg par byed | ’tshod par byed | ltuṅ bar byed pa’o || gźan yaṅ ji srid du ltuṅ ba de ma bśags śiṅ so sor ma bśags na dge ba’i chos rnams la sgrib par byed pa ste | des na ltuṅ byed do źes (3) gsuṅs so || de la ltuṅ bar ji ltar ’gyur źe na | dge sloṅ gis dge sloṅ la sṅaṅs par bya ba’i bsam pas ’di lta ste dper na yi dgas daṅ | śa za daṅ | grul bum daṅ | lus srul po gzugs la ba nag po daṅ | sol ba daṅ | ka ba tshig pa lta bu gzugs (4) yid du mi ’oṅ ba dag yod de | de dag gis khyod khrid par ’gyur | de dag gis khyod gsod par ’gyur | de dag gis khyod srog daṅ bral bar byed par ’gyur ro źas ñe bar sgyur bar byed na | dge sloṅ ’jigs pa skyes kyaṅ ruṅ ma skyes kyaṅ ruṅ dge sloṅ la ltuṅ byed du ’gyur ro || dge (5) sloṅ gis dge sloṅ la sṅaṅs par bya ba’i bsam pas ’di lta ste dper na yi dgas daṅ | śa za daṅ | grul bum daṅ | lus srul po sgra seṅ ge daṅ | stag daṅ | guṅ daṅ || mtsha’ daṅ | gzigs daṅ | wa’i skad lta bu sgra yid du mi ’oṅ ba dag yod de | de dag (6) gis khyod khrid par ’gyur | de dag gis khyod gsod par ’gyur | de dag gis khyod srog daṅ bral bar byed par ’gyur ro || źes ñe bar sgrub par byed na | dge sloṅ ’jigs pa skyes kyaṅ ruṅ ma skyes kyaṅ ruṅ dge sloṅ la ltuṅ byed du ’gyur ro || dge sloṅ gis dge sloṅ (7) la sṅaṅs par bya ba’i bsam pas ’di lta ste | dper na yi dgas daṅ | śa za daṅ | grul bum daṅ | lus srul po dri bśaṅ ba daṅ | gci ba daṅ | ra daṅ | ra’i ze ba’i dri lta bu dri yid du mi ’oṅ ba dag yod de | de dag gis khyod khrid par ’gyur | de dag (271b1) gis khyod gsod par ’gyur | de dag gis khyod srog daṅ bral bar byed par ’gyur ro źes ñe bar sgrub par byed na | dge sloṅ ’jigs pa skyes kyaṅ ruṅ dge sloṅ la ltuṅ byed du ’gyur ro || dge sloṅ gis dge sloṅ la sṅaṅs par bya ba’i bsam pas ’di (2) lta ste dper na yi dgas daṅ | śa za daṅ | grul bum daṅ | lus srul po reg pa seg daṅ | re lde daṅ | phyar pa’i reg pa lta bu reg pa yid du mi ’oṅ ba dag yod de | de dag gis khyod khrid par ’gyur | de dag gis khyod gsod par ’gyur | de dag gis (3) khyod srog daṅ bral bar byed par ’gyur ro źes ñe bar sgrub par byed na | dge sloṅ ’jigs pa skyes kyaṅ ruṅ ma skyes kyaṅ ruṅ dge sloṅ la ltuṅ byad du ’gyur ro || dge sloṅ gis dge sloṅ la sṅaṅs par bya ba’i bsam pas ’di lta ste dper na lha daṅ | klu daṅ | dri za daṅ | (4) gnod sbyin daṅ | mi ’am ci daṅ | lto ’phye chen po gzugs rgyal po daṅ | blon po chen po daṅ | bram ze daṅ | khyim bdag daṅ | nor can daṅ | tshoṅ dpo daṅ | ded dpon lta bu gzugs yid du ’oṅ ba dag yod de | de dag gis khyod khrid par ’gyur | de dag (5) gis khyod gsod par ’gyur | de dag gis khyod srog daṅ bral bar byed par ’gyur ro źes ne bar sgrub par byed na | dge sloṅ ’jigs pa skyes kyaṅ ruṅ ma skyes kyaṅ ruṅ dge sloṅ la ñes byas su ’gyur ro || dge sloṅ gis dge sloṅ la sṅaṅs par bya ba’i bsam pas ’di (6) lta ste | dper na lha daṅ | klu daṅ | dri za daṅ | gnod sbyin daṅ | mi ’am ci daṅ | lto ’phye chen po sgra pi baṅ daṅ | ’od ma daṅ | pa la ri daṅ | ma ha ti daṅ | su g+ho śa ka’i sgra lta bu yid du ’oṅ ba dag yod de | de dag gis khyod khrid par ’gyur | de dag gis khyod (7) gsod par ’gyur | de dag gis khyod srog daṅ bral bar byed par ’gyur ro | źes ñe bar sgrub par byed na | dge sloṅ ’jigs pa skyes kyaṅ ruṅ ma skyes kyaṅ ruṅ dge sloṅ la ñes byas su ’gyur ro || dge sloṅ gis dge sloṅ la sṅaṅs par bya ba’i bsam pas ’di (272a1) lta ste dper na | lha daṅ | klu daṅ | dri za daṅ | gnod sbyin daṅ | mi ’am ci daṅ | lto ’phye chen po dri a ga ru daṅ | tsan dan daṅ | gur gum daṅ | tam la’i lo ma’i dri lta bu dri yid du ’oṅ bdag yod de | de dag gis khyod khrid par ’gyur | de (2) dag gis khyod gsod par ’gyur | de dag gis khyod srog daṅ bral bar byed par ’gyur ro źes sgrub par byed na | dge sloṅ ’jigs pa skyes kyaṅ ruṅ ma skyes kyaṅ ruṅ dge sloṅ la ñes byas su ’gyur ro || dge sloṅ gis dge sloṅ la sṅaṅs par bya ba’i bsam pas ’di (3) lta ste | dper na lha daṅ | klu daṅ | dri za daṅ | gnod sbyin daṅ | mi ’am ci daṅ | lto ’phye chen po reg pa dar daṅ | ras yug chen daṅ | be’u ras daṅ | dar la daṅ | du gu la’i ras daṅ | ko tam pa’i ras kyi reg pa lta bu reg pa yid du ’oṅ ba dag yod de | (4) de dag gis khyod khrid par ’gyur | de dag gis khyod gsod par ’gyur | de dag gis khyod srog daṅ bral bar byed par ’gyur ro źes ñe bar sgrub par byed na | dge sloṅ ’jigs pa skyes kyaṅ ruṅ ma skyes kyaṅ ruṅ dge sloṅ la ñes byas su ’gyur ro || skyo bar bya ba’i (5) ched du sems can dmyal ba’i gtam daṅ | dud ’gro’i gtam daṅ | yi dgas kyi gtam daṅ | lha’i gtam daṅ | mi’i gtam zer ba la ni ltuṅ ba med do || las daṅ po pa daṅ | smyos pa daṅ | sems ’khrugs pa daṅ | tshor ba dag gis ñen pa la (6) ltuṅ ba med do || sṅaṅs par byed pa’i ltuṅ byed de drug bcu rtsa drug pa rdzogs s+ho || || ’dul ba rnam par ’byed pa | bam po drug bcu rtsa gñis pa |

.