’jam dpal gyis gsol pa | bcom ldan ’das byaṅ chub kyi yan lag bdun rnams ji ltar blta bar bgyi | bcom ldan ’das kyis bka’ stsal pa | ’jam dpal gaṅ gis chos thams cad raṅ bźin med ciṅ yid la byar med par mthoṅ ba ’di ni dran pa yaṅ dag byaṅ chub kyi yan lag go || ’jam dpal gaṅ gis dge ba daṅ mi dge ba daṅ | luṅ du ma bstan par rab tu phye ste brtags na yoṅs su ma grub pas chos thams cad mi dmigs pa ’di ni chos rab tu ’byed pa yaṅ dag byaṅ chub kyi yan lag go || ’jam dpal gaṅ gis khams kyi ’du śes śin tu rig pa’i phyir | khams gsum pa mi len mi ’dor ba ’di ni brtson ’grus yaṅ dag byaṅ chub kyi yan lag go || ’jam dpal gaṅ gis dga’ ba daṅ | mi dga’ ba śin tu rtogs pa’i phyir | ’du byed thams cad la dga’ ba mi skyed pa ’di ni dga’ ba yaṅ dag byaṅ chub kyi yan lag go || ’jam dpal gaṅ gis dmigs pa’i dṅos po mi dmigs te | chos thams cad la sems bag yoṅs su gyur pa ’di ni bag yaṅs yaṅ dag byaṅ chub kyi yan lag go || ’jam dpal gaṅ gis chos thams cad rnam par bsgom pa rjes su rtogs pas sems mi dmigs pa ’di ni tiṅ ṅe ’dzin yaṅ dag byaṅ chub kyi yan lag go || gaṅ chos thams cad la mi gnas mi rten la chags par mi ’gyur | śes par mi ’gyur źiṅ chos thams cad yaṅ dag par rjes su ma mthoṅ bas | btaṅ sñoms su gnas pa ’di ni btaṅ sñoms yaṅ dag byaṅ chub kyi yan lag go || ’jam dpal byaṅ chub kyi yan lag bdun ni de ltar blta’o ||