rigs kyi bu de’i tshe de’i dus na | dge sloṅ chos smra ba spyod pa rnam par dag pa źes bya ba de gźan źig yin par sems na | de ltar mi blta ste | de ci’i phyir źe na | de bźin gśegs pa mi sgul ba ni de’i tshe de’i dus na | dge sloṅ chos smra ba spyod pa rnam par dag pa źes bya bar gyur to || rigs kyi bu de’i tshe de’i dus na | dge sloṅ chos smra ba spyod pa’i blo gros źes bya ba de gźan źig yin pa sñam du sems na | de ltar mi blta ste | de ci’i phyir źe na | ṅa ni dge sloṅ chos smra ba spyod pa’i blo gros źes bya bar gyur to || ṅa yaṅ de lta bu’i thabs phra mos de la ma dad pa’i sems bskyed de | las kyi sgrib pa mṅon par ’dus byas pas sems can dmyal ba dag tu lhuṅ bar gyur to ||