’jam dpal gyis gsol pa | bcom ldan ’das ’phags pa’i lam yan lag brgyad pa ji ltar blta bar bgyi | bcom ldan ’das kyis bka’ stsal pa | ’jam dpal gaṅ gis chos thams cad mi mñam pa med ciṅ gñis su med de gñis su byar med par mthoṅ ba ’di ni yaṅ dag pa’i lta ba’o || ’jam dpal gaṅ gis chos thams cad mthoṅ ba med pa’i tshul gyis brtag tu med ciṅ rnam par brtag tu med la | yoṅs su brtag tu med par mthoṅ ba ’di ni yaṅ dag pa’i rtog pa’o || ’jam dpal gaṅ gis brjod du med pa mñam pa ñid śin tu bsgoms pa’i phyir | chos thams cad brjod du med par mthoṅ ba ’di ni yaṅ dag pa’i ṅag go || ’jam dpal gaṅ gis byed pa mi dmigs pa’i phyir | chos thams cad bya ba med ciṅ byed pa med par mthoṅ ba ’di ni yaṅ dag pa’i las kyi mtha’o || ’jam dpal gaṅ ’tsho ba mñam pa ñid la gnas pa’i phyir | chos thams cad mi sogs mi ’bri ba ’di ni yaṅ dag pa’i ’tsho ba’o || ’jam dpal gaṅ rtsol ba med ciṅ sgrub pa med pa’i tshul gyis | chos thams cad yoṅs su sgrub pa med pa ’di ni yaṅ dag pa’i rtsol ba’o || ’jam dpal gaṅ dran pa’i las kyis dben pa’i phyir | chos thams cad yid la mi byed ciṅ | dran pa med pa ’di ni yaṅ dag pa’i dran pa’o || ’jam dpal gaṅ chos thams cad mi dmigs pa’i phyir | raṅ bźin gyis mñam par gźag ciṅ | ’khrug pa med la dmigs pa med par mthoṅ ba ’di ni yaṅ dag pa’i tiṅ ṅe ’dzin to || ’jam dpal ’phags pa’i lam yan lag brgyad pa ni de ltar blta ste |