Bibliotheca Polyglotta

Khuddakanikāya: Vimānavatthu

Complete text

Itthivimāna

Purisavimāna

Back to library

(057) IV MAÑJEṬṬHAKAVAGGA

39 Mañjeṭṭhakavimānavatthu

Vv_IV,1[=39].1 Mañjeṭṭhake vimānasmiṃ soṇṇavālukasanthate pañcaṅgikena turiyena ramasi suppavādite. || 684 ||

Vv_IV,1[=39].2 Tamhā vimānā oruyha nimmitā ratanāmayā ogāhasi sālavanaṃ pupphitaṃ sabbakālikaṃ. || 685 ||

Vv_IV,1[=39].3 Yassa yass’ eva sālassa mūle tiṭṭhasi devate so so muñcati pupphāni onamitvā dumuttamo. || 686 ||

Vv_IV,1[=39].4 Vāteritaṃ sālavanaṃ ādhutaṃ dijasevitaṃ vāti gandho disā sabbā rukkho mañjūsako yathā. || 687 ||

Vv_IV,1[=39].5 Ghāyase taṃ sucigandhaṃ rūpaṃ passasi amānusaṃ devate pucchitācikkha kissa kammass’ idaṃ phalan ti. || 688 ||

Vv_IV,1[=39].6 Ahaṃ manussesu manussabhūtā dāsī ayirakule ahuṃ buddhaṃ nisinnaṃ disvāna sālapupphehi okiriṃ. || 689 ||

Vv_IV,1[=39].7 Vaṭaṃsakañ ca sukataṃ sālapupphamayaṃ ahaṃ buddhassa upanāmesiṃ pasannā sehi pāṇihi. || 690 ||

Vv_IV,1[=39].8 Tāhaṃ kammaṃ karitvāna kusalaṃ buddhavaṇṇitaṃ apetasokā sukhitā sampamodām’ anāmayā ti. || 691 ||

Mañjeṭṭhaka1-vimānaṃ

(058) 40 Pabhassaravimānavatthu

Vv_IV,2[=40].1 Pabhassaravaravaṇṇanibhe surattavatthanivāsane mahiddhike candanaruciragatte kā tvaṃ subhe devate vandase mamaṃ. || 692 ||

Vv_IV,2[=40].2 Pallaṅko ca te mahaggho nānāratanacittito ruciro yattha tvaṃ nisinnā virocasi devarājā-r-iva Nandane vane. || 693 ||

Vv_IV,2[=40].3 Kiṃ tvaṃ pure sucaritam ācarī bhadde kissa kammassa vipākaṃ anubhosi devalokasmiṃ devate pucchitācikkha kissa kammass’ idaṃ phalan ti. || 694 ||

Vv_IV,2[=40].4 Piṇḍāya te carantassa mālaṃ phāṇitañ ca adadaṃ bhante tassa kammass’ idaṃ vipākaṃ anubhomi devalokasmiṃ. || 695 ||

Vv_IV,2[=40].5 Hoti ca me anutāpo aparaddhaṃ dukkatañ ca me bhante sāhaṃ dhammaṃ nāssosiṃ sudesitaṃ dhammarājena. || 696 ||

Vv_IV,2[=40].6 Taṃ taṃ vadāmi bhaddante yassa me anukampiyo koci dhammesu taṃ samādapetha sudesitaṃ dhammarājena. || 697 ||

Vv_IV,2[=40].7 Yesaṃ atthi saddhā buddhe dhamme ca saṅgharatane ca te maṃ ativirocanti āyunā yasasā siriyā, || 698 ||

Vv_IV,2[=40].8 Patāpena vaṇṇena uttaritarā aññe mahiddhikatarā mayā devā ti. || 699 ||

Pabhassaravimānaṃ

(059) 41 Nāgavimānavatthu

Vv_IV,3[=41].1 Alaṅkatā maṇikañcanācitaṃ suvaṇṇajālacittaṃ mahantaṃ abhiruyha gajavaraṃ sukappitaṃ idhāgamā vehāsayam antalikkhe. || 700 ||

Vv_IV,3[=41].2 Nāgassa dantesu duvesu nimmitā acchodikā paduminiyo suphullā padumesu ca turiyagaṇā pabhijjare imā ca naccanti manoharāyo. || 701 ||

Vv_IV,3[=41].3 Dev 'iddhipattāsi mahānubhāve manussabhūtā kim akāsi puññaṃ kenāsi evaṃ jalitānubhāvā vaṇṇo ca te sabbadisā pabhāsatī ti. || 702 ||

Vv_IV,3[=41].4 Bārāṇasiyaṃ upasaṅkamitvā buddhass’ ahaṃ vatthayugaṃ adāsiṃ pādāni vanditva chamā nisīdiṃ vittā v’ ahaṃ añjalikaṃ akāsiṃ. || 703 ||

Vv_IV,3[=41].5 Buddho ca me kañcanasannibhattaco adesayī samudayadukkhaniccataṃ asaṅkhataṃ dukkhanirodhasassataṃ maggaṃ adesesi yato vijānisaṃ. || 704 ||

Vv_IV,3[=41].6 Appāyukī kālakatā tato cutā upapannā Tidasagaṇaṃ yasassinī Sakkass’ ahaṃ aññatarā pajāpatī Yasuttarā nāma disāsu vissutā ti. || 705 ||

Nāgavimānaṃ

(060) 42 Alomavimānavatthu

Vv_IV,4[=42].1 Abhikkantena vaṇṇena yā tvaṃ tiṭṭhasi devate obhāsentī disā sabbā osadhī viya tārakā, || 706 ||

Vv_IV,4[=42].2 Kena t’ etādiso vaṇṇo kena te idha-m-ijjhati uppajjanti ca te bhogā ye keci manaso piyā. || 707 ||

Vv_IV,4[=42].3 Pucchāmi taṃ devi mahānubhāve manussabhūtā kim akāsi puññaṃ kenāsi evaṃ jalitānubhāvā vaṇṇo ca te sabbadisā pabhāsatī ti. || 708 ||

Vv_IV,4[=42].4 Sā devatā attamanā Moggallānena pucchitā pañhaṃ puṭṭhā viyākāsi yassa kammass’ idaṃ phalaṃ: || 709 ||

Vv_IV,4[=42].5 Ahañ ca Bārāṇasiyaṃ buddhassādiccabandhuno adāsiṃ sukkhakummāsaṃ pasannā sehi pāṇihi. || 710 ||

Vv_IV,4[=42].6 Sukkhāya aloṇikāya ca passa phalaṃ kummāsapiṇḍiyā Alomaṃ sukhitaṃ disvā ko puññaṃ na karissatī ti. || 711 ||

Vv_IV,4[=42].7 Tena m’ etādiso vaṇṇo tena me idha-m-ijjhati uppajjanti ca me bhogā ye keci manaso piyā. || 712 ||

(061) Vv_IV,4[=42].8 Akkhāmi te bhikkhu mahānubhāva manussabhūtā yam akāsi puññaṃ ten’ amhi evaṃ jalitānubhāvā vaṇṇo ca me sabbadisā pabhāsatī ti. || 713 ||

Aloma-vimānaṃ

43 Kañjikadāyikāvimānavatthu

Vv_IV,5[=43].1 Abhikkantena vaṇṇena yā tvaṃ tiṭṭhasi devate obhāsentī disā sabbā osadhī viya tārakā, || 714 ||

Vv_IV,5[=43].2 Kena t’ etādiso vaṇṇo kena te idha-m-ijjhati uppajjanti ca te bhogā ye keci manaso piyā. || 715 ||

Vv_IV,5[=43].3 Pucchāmi taṃ devi mahānubhāve manussabhūtā kim akāsi puññaṃ kenāsi evaṃ jalitānubhāvā vaṇṇo ca te sabbadisā pabhāsatī ti. || 716 ||

Vv_IV,5[=43].4 Sā devatā attamanā Moggallānena pucchitā pañhaṃ puṭṭhā viyākāsi yassa kammass’ idaṃ phalaṃ: || 717 ||

Vv_IV,5[=43].5 Ahaṃ Andhakavindasmiṃ buddhassādiccabandhuno adāsiṃ kolasampākaṃ kañjikaṃ teladhūpitaṃ. || 718 ||

Vv_IV,5[=43].6 Pipphalyā lasuṇena ca missaṃ lāmañjakena ca adāsiṃ ujubhūtasmiṃ vippasannena cetasā. || 719 ||

Vv_IV,5[=43].7 Yā mahesittaṃ kāreyya cakkavattissa rājino nāri sabbaṅgakalyāṇī bhattu cānomadassikā etassa kañjikadānassa kalaṃ nāgghati soḷasiṃ. || 720 ||

Vv_IV,5[=43].8 Sataṃ nikkhā sataṃ assā sataṃ assatarīrathā sataṃ kaññāsahassāni āmuttamaṇikuṇṇalā etassa kañjikadānassa kalaṃ nāgghanti soḷasiṃ. || 721 ||

Vv_IV,5[=43].9 Sataṃ Hemavatā nāgā īsādantā urūḷhavā suvaṇṇakacchā mātaṅgā hemakappanavāsasā etassa kañjikadānassa kalaṃ nāgghanti soḷasiṃ. || 722 ||

(062) Vv_IV,5[=43].10 Catunnam api dīpānaṃ issaraṃ yo 'dha kāraye etassa kañjikadānassa kalaṃ nāgghati soḷasin ti. || 723 ||

Kañjikadāyikāvimānaṃ

44 Vihāravimānavatthu

Vv_IV,6[=44].1 Abhikkantena vaṇṇena yā tvaṃ tiṭṭhasi devate obhāsentī disā sabbā osadhī viya tārakā, || 724 ||

Vv_IV,6[=44].2 Tassā te naccamānāya aṅga-m-aṅgehi sabbaso dibbā saddā niccharanti savanīyā manoramā. || 725 ||

Vv_IV,6[=44].3 Tassā te naccamānāya aṅga-m-aṅgehi sabbaso dibbā gandhā pavāyanti sucigandhā manoramā. || 726 ||

Vv_IV,6[=44].4 Vivattamānā kāyena yā veṇīsu pilandhanā tesaṃ suyyati nigghoso turiye pañcaṅgike yathā. || 727 ||

Vv_IV,6[=44].5 Vaṭamsakā vātadhutā vātena sampakampitā tesaṃ suyyati nigghoso turiye pañcaṅgike yathā. || 728 ||

Vv_IV,6[=44].6 Yā pi te sirasmiṃ mālā sucigandhā manoramā vāti gandho disā sabbā rukkho mañjūsako yathā. || 729 ||

Vv_IV,6[=44].7 Ghāyase taṃ sucigandhaṃ rūpaṃ passasi amānusaṃ devate pucchitācikkha kissa kammass’ idaṃ phalan ti. || 730 ||

Vv_IV,6[=44].8 Sāvatthiyaṃ mayha sakhī bhadante saṅghassa kāresi mahāvihāraṃ tattha ppasannā aham ānumodiṃ disvā agārañ ca piyañ ca me taṃ. || 731 ||

(063) Vv_IV,6[=44].9 Tāy’ eva me suddhanumodanāya laddhaṃ vimānabbhutadassaneyyaṃ samantato soḷasa yojanāni vehāsayaṃ gacchati iddhiyā mama. || 732 ||

Vv_IV,6[=44].10 Kuṭāgārā nivesā me vibhattā bhāgaso mitā daddallamānā ābhanti samantā satayojanaṃ. || 733 ||

Vv_IV,6[=44].11 Pokkharañño ca me ettha puthulomanisevitā acchodikā vippasannā soṇṇavālukasanthatā. || 734 ||

Vv_IV,6[=44].12 Nānāpadumasañchannā puṇḍarīkasamotatā surabhī sampavāyanti manuññā māluteritā. || 735 ||

Vv_IV,6[=44].13 Jambuyo panasā tālā nāḷikeravanāni ca antonivesane jātā nānārukkhā aropimā. || 736 ||

Vv_IV,6[=44].14 Nānāturiyasaṅghuṭṭham accharāgaṇaghositaṃ yo pi maṃ supine passe so pi vitto siyā naro. || 737 ||

Vv_IV,6[=44].15 Etādisaṃ abbhutadassaneyyaṃ vimānam sabbato pabhaṃ mama kammehi nibbattaṃ alaṃ puññāni kātave ti. || 738 ||

Vv_IV,6[=44].16 Tāy’ eva te suddhanumodanāya laddhaṃ vimānabbhutadassaneyyaṃ yā c’ eva sā dānam adāsi nārī tassā gatiṃ brūhi kuhiṃ upapannā sā ti. || 739 ||

Vv_IV,6[=44].17 Yā sā ahu mayha sakhī bhadante saṅghassa kāresi mahāvihāraṃ viññātadhammā sā adāsi dānaṃ upapannā Nimmānaratīsu devesu. || 740 ||

Vv_IV,6[=44].18 Pajāpatī tassa Sunimmitassa acintiyo kammavipāka tassā yam etaṃ pucchasi kuhiṃ upapannā sā tan te viyākāsim anaññathā ahan ti. || 741 ||

Vv_IV,6[=44].19 Tena h’ aññe pi samādapetha saṅghassa dānāni dadātha vittā dhammañ ca suṇātha pasannamānasā sudullabho laddho manussalābho. || 742 ||

Vv_IV,6[=44].20 Yaṃ maggaṃ maggādhipatī adesayi brahmassaro kañcanasannibhattaco saṅghassa dānāni dadātha vittā mahapphalā yattha bhavanti dakkhiṇā. || 743 ||

(064) Vv_IV,6[=44].21 Ye puggalā aṭṭha sataṃ pasatthā cattāri etāni yugāni honti te dakkhiṇeyyā sugatassa sāvakā etesu dinnāni mahapphalāni. || 744 ||

Vv_IV,6[=44].22 Cattāro ca paṭipannā cattāro ca phale ṭhitā esa saṅgho ujubhūto paññāsīlasamāhito. || 745 ||

Vv_IV,6[=44].23 Yajamānānaṃ manussānaṃ puññapekkhāna pāṇinaṃ karotaṃ opadhikaṃ puññaṃ saṅghe dinnaṃ mahapphalaṃ. || 746 ||

Vv_IV,6[=44].24 Eso hi saṅgho vipulo mahaggato es’ appameyyo udadhīva sāgaro ete hi seṭṭhā naravīrasāvakā pabhaṅkarā dhammam udīrayanti. || 747 ||

Vv_IV,6[=44].25 Tesaṃ sudinnaṃ suhutaṃ suyiṭṭhaṃ ye saṅgham uddissa dadanti dānaṃ sā dakkhiṇā saṅghagatā patiṭṭhitā mahapphalā lokavidūna vaṇṇitā. || 748 ||

Vv_IV,6[=44].26 Etādisaṃ yaññam anussarantā ye vedajātā vicaranti loke vineyya maccheramalaṃ samūlaṃ aninditā saggam upenti ṭhānan ti. || 749 ||

Vihāravimānaṃ Bhāṇavāraṃ dutiyaṃ

(065) 45 Caturitthivimānavatthu

Vv_IV,7[=45].1 Abhikkantena vaṇṇena yā tvaṃ tiṭṭhasi devate obhāsentī disā sabbā osadhī viya tārakā, || 750 ||

Vv_IV,7[=45].2 Kena t’ etādiso vaṇṇo kena te idha-m-ijjhati uppajjanti ca te bhogā ye keci manaso piyā. || 751 ||

Vv_IV,7[=45].3 Pucchāmi taṃ devi mahānubhāve manussabhūtā kim akāsi puññaṃ kenāsi evaṃ jalitānubhāvā vaṇṇo ca te sabbadisā {pabhāsatī ti}. || 752 ||

Vv_IV,7[=45].4 Sā devatā attamanā Moggallānena pucchitā pañhaṃ puṭṭhā viyākāsi yassa kammass’ idaṃ phalaṃ: || 753 ||

(066) Vv_IV,7[=45].5 Indīvarānaṃ hatthakam ahaṃ adāsiṃ bhikkhuno piṇḍāya carantassa Esikānaṃ unnatasmiṃ nagaravare Paṇṇakate ramme. || 754 ||

Vv_IV,7[=45].6 Tena m’ etādiso vaṇṇo tena me idha-m-ijjhati uppajjanti ca me bhogā ye keci manaso piyā. || 755 ||

Vv_IV,7[=45].7 Akkhāmi te bhikkhu mahānubhāva manussabhūtā yam akāsi puññaṃ ten’ amhi evaṃ jalitānubhāvā vaṇṇo ca me sabbadisā pabhāsatī ti. || 756 ||

Vv_IV,7[=45].8-11 Abhikkantena vaṇṇena . . . pe . . . yassa kammass’ idaṃ phalaṃ: || 757-760 ||

Vv_IV,7[=45].12 Nīluppalahatthakam ahaṃ adāsiṃ bhikkhuno piṇḍāya carantassa Esikānaṃ unnatasmiṃ nagaravare Paṇṇakate ramme. || 761 ||

Vv_IV,7[=45].13-14 Tena m’ etādiso vaṇṇo . . . pe . . . vaṇṇo ca me sabbadisā pabhāsatī ti. (= vv. 6-7 above) || 762-763 ||

Vv_IV,7[=45].15-18 Abhikkantena vaṇṇena . . . pe . . . yassa kammass’ idaṃ phalaṃ: (= vv. 1-4 above) || 764-767 ||

Vv_IV,7[=45].19 Odātamūlakaṃ harītapattaṃ udakasmiṃ sare jātam ahaṃ adāsiṃ Esikānaṃ unnatasmiṃ nagaravare Paṇṇakate ramme. || 768 ||

Vv_IV,7[=45].20-21 Tena m’ etādiso vaṇṇo . . . pe . . . vaṇṇo ca me sabbadisā pabhāsatī ti. (= vv. 6-7 above) || 769-770 ||

Vv_IV,7[=45].22-25 Abhikkantena vaṇṇena . . . pe . . . yassa kammass’ idam phalam: (= vv. 1-4 above) || 771-774 ||

Vv_IV,7[=45].26 Ahaṃ Sumanā sumanassa sumanamakuḷāni dantavaṇṇāni ahaṃ adāsiṃ bhikkhuno piṇḍāya carantassa Esikānaṃ unnatasmiṃ nagaravare Paṇṇakate ramme. || 775 ||

(067) Vv_IV,7[=45].27-28 Tena m’ etādiso vaṇṇo . . . pe . . . vaṇṇo ca me sabbadisā pabhāsatī ti. (= vv. 6-7 above) || 776-777 ||

Caturitthivimānaṃ

46 Ambavimānavatthu

Vv_IV,8[=46].1 Dibban te ambavanaṃ rammaṃ pāsād’ ettha mahallako nānāturiyasaṅghuṭṭho accharāgaṇaghosito. || 778 ||

Vv_IV,8[=46].2 Padīpo c’ ettha jalati niccaṃ sovaṇṇayo mahā dussaphalehi rukkhehi samantā parivārito. || 779 ||

Vv_IV,8[=46].3 Kena t’ etādiso vaṇṇo kena te idha-m-ijjhati uppajjanti ca te bhogā ye keci manaso piyā. || 780 ||

Vv_IV,8[=46].4 Pucchāmi taṃ devi mahānubhāve manussabhūtā kim akāsi puññaṃ kenāsi evaṃ jalitānubhāvā vaṇṇo ca te sabbadisā pabhāsatī ti. || 781 ||

Vv_IV,8[=46].5 Sā devatā attamanā Moggallānena pucchitā pañhaṃ puṭṭhā viyākāsi yassa kammass’ idaṃ phalaṃ: || 782 ||

Vv_IV,8[=46].6 Ahaṃ manussesu manussabhūtā purimāya jātiyā manussaloke vihāraṃ saṅghassa kāresiṃ ambehi parivāritaṃ. || 783 ||

Vv_IV,8[=46].7 Pariyosite vihāre kārente niṭṭhite mahe ambe acchādayitvāna katvā dussamaye phale, || 784 ||

Vv_IV,8[=46].8 Padīpaṃ tattha jāletvā bhojayitvā gaṇuttamaṃ niyyādesiṃ taṃ saṅghassa pasannā sehi pāṇihi. || 785 ||

Vv_IV,8[=46].9 Tena me ambavanaṃ rammaṃ pāsād’ ettha mahallako nānāturiyasaṅghuṭṭho accharāgaṇaghosito. || 786 ||

(068) Vv_IV,8[=46].10 Padīpo c’ ettha jalati niccaṃ sovaṇṇayo mahā dussaphalehi rukkhehi samantā parivārito. || 787 ||

Vv_IV,8[=46].11 Tena m’ etādiso vaṇṇo tena me idha-m-ijjhati uppajjanti ca me bhogā ye keci manaso piyā. || 788 ||

Vv_IV,8[=46].12 Akkhāmi te bhikkhu mahānubhāva manussabhūtā yam akāsi puññaṃ ten’ amhi evaṃ jalitānubhāvā vaṇṇo ca me sabbadisā pabhāsatī ti. || 789 ||

Ambavimānaṃ

47 Pītavimānavatthu

Vv_IV,9[=47].1 Pītavatthe pītadhaje pītālaṅkārabhūsite pītacandanalittaṅge pītuppalamālinī, || 790 ||

Vv_IV,9[=47].2 Pītapāsādasayane pītāsane pītabhājane pītachatte pītarathe pītasse pītavījane, || 791 ||

Vv_IV,9[=47].3 Kiṃ kammam akarī bhadde pubbe mānusake bhave devate pucchitācikkha kissa kammass’ idaṃ phalan ti. || 792 ||

Vv_IV,9[=47].4 Kosātakī nāma lat’ atthi bhante tittikā anabhijjhitā tassā cattāri pupphāni thūpaṃ abhihariṃ ahaṃ. || 793 ||

Vv_IV,9[=47].5 Satthu sarīraṃ uddissa vippasannena cetasā nāssa maggaṃ avekkhissaṃ na taggamanasā satī. || 794 ||

Vv_IV,9[=47].6 Tato maṃ avadhī gāvī thūpaṃ appattamānasaṃ tañ cāhaṃ abhisañceyyaṃ bhiyyo nūna ito siyā. || 795 ||

Vv_IV,9[=47].7 Tena kammena devinda Maghavā devakuñjara pahāya mānusaṃ dehaṃ tava sahavyatam āgatā ti. || 796 ||

(069) Vv_IV,9[=47].8 Idaṃ sutvā Tidasādhipati Maghavā devakuñjaro Tāvatiṃse pasādento Mātaliṃ etad abravi: || 797 ||

Vv_IV,9[=47].9 Passa Mātali accheraṃ cittaṃ kammaphalaṃ idaṃ appakam pi kataṃ deyyaṃ puññaṃ hoti mahapphalaṃ. || 798 ||

Vv_IV,9[=47].10 Natthi citte pasannamhi appakā nāma dakkhiṇā tathāgate vā sambuddhe atha vā tassa sāvake. || 799 ||

Vv_IV,9[=47].11 Ehi Mātali amhe pi bhiyyo bhiyyo mahemase tathāgatassa dhātuyo sukho puññānam uccayo. || 800 ||

Vv_IV,9[=47].12 Tiṭṭhante nibbute cāpi same citte samaṃ phalaṃ cetopaṇidhihetu hi sattā gacchanti suggatiṃ. || 801 ||

Vv_IV,9[=47].13 Bahunnaṃ vata atthāya uppajjanti tathāgatā yattha kāraṃ karitvāna saggaṃ gacchanti dāyakā ti. || 802 ||

Pītavimānaṃ

48 Ucchuvimānavatthu

Vv_IV,10[=48].1 Obhāsayitvā paṭhaviṃ sadevakaṃ atirocasi candimasūriyā viya siriyā ca vaṇṇena yasena tejasā Brahmā va deve Tidase sa-h-Indake. || 803 ||

(070) Vv_IV,10[=48].2 Pucchāmi taṃ uppalamāladhārinī āveḷinī kañcanasannibhattace alaṅkate uttamavatthadhārinī kā tvaṃ subhe devate vandase mamaṃ. || 804 ||

Vv_IV,10[=48].3 Kiṃ tvaṃ pure kammam akāsi attanā manussabhūtā purimāya jātiyā dānaṃ suciṇṇaṃ atha sīlasaññamaṃ kenūpapannā sugatiṃ yasassinī devate pucchitācikkha kissa kammass’ idaṃ phalan ti. || 805 ||

Vv_IV,10[=48].4 Idāni bhante imam eva gāmaṃ piṇḍāya amhāka gharaṃ upāgami tato te ucchussa adāsi khaṇḍikaṃ pasannacittā atulāya pītiyā. || 806 ||

Vv_IV,10[=48].5 Sassu ca pacchā anuyuñjate mamaṃ:

kahan nu ucchuṃ vadhuke avākiri.

Na chaḍḍitaṃ no pana khāditaṃ mayā santassa bhikkhussa sayaṃ adās’ ahaṃ. || 807 ||

Vv_IV,10[=48].6 Tuyhaṃ nv idaṃ issariyaṃ atho mama, iti ssā sassu paribhāsate mamaṃ leḍḍuṃ gahetvā pahāraṃ adāsi me tato cutā kālakatāmhi devatā. || 808 ||

Vv_IV,10[=48].7 Tad eva kammaṃ kusalaṃ kataṃ mayā sukhañ ca kammaṃ anubhomi attanā devehi saddhiṃ paricārayām’ ahaṃ modām’ ahaṃ kāmaguṇehi pañcahi. || 809 ||

Vv_IV,10[=48].8 Tad eva kammaṃ kusalaṃ kataṃ mayā sukhañ ca kammaṃ anubhomi attanā devindaguttā Tidasehi rakkhitā samappitā kāmaguṇehi pañcahi. || 810 ||

Vv_IV,10[=48].9 Etādisaṃ puññaphalaṃ anappakaṃ mahāvipākā mama ucchudakkhiṇā devehi saddhiṃ paricārayām’ ahaṃ modām’ ahaṃ kāmaguṇehi pañcahi. || 811 ||

Vv_IV,10[=48].10 Etādisaṃ puññaphalaṃ anappakaṃ mahājutīkā mama ucchudakkhiṇā devindaguttā Tidasehi rakkhitā sahassanetto-r-iva Nandane vane. || 812 ||

(071) Vv_IV,10[=48].11 Tuvañ ca bhante anukampakaṃ viduṃ upecca vandiṃ kusalañ ca pucchisaṃ tato te ucchussa adāsi khaṇḍikaṃ pasannacittā atulāya pītiyā ti. || 813 ||

Ucchuvimānaṃ

49 Vandanavimānavatthu

Vv_IV,11[=49].1 Abhikkantena vaṇṇena yā tvaṃ tiṭṭhasi devate obhāsentī disā sabbā osadhī viya tārakā, || 814 ||

Vv_IV,11[=49].2 Kena t’ etādiso vaṇṇo kena te idha-m-ijjhati uppajjanti ca te bhogā ye keci manaso piyā. || 815 ||

(072) Vv_IV,11[=49].3 Pucchāmi taṃ devi mahānubhāve manussabhūtā kim akāsi puññaṃ kenāsi evaṃ jalitānubhāvā vaṇṇo ca te sabbadisā pabhāsatī ti. || 816 ||

Vv_IV,11[=49].4 Sā devatā attamanā Moggallānena pucchitā pañhaṃ puṭṭhā viyākāsi yassa kammass’ idaṃ phalaṃ: || 817 ||

Vv_IV,11[=49].5 Ahaṃ manussesu manussabhūtā disvāna samaṇe sīlavante pādāni vanditva manaṃ pasādayiṃ vittā c’ ahaṃ añjalikaṃ akāsiṃ. || 818 ||

Vv_IV,11[=49].6 Tena m’ etādiso vaṇṇo tena me idha-m-ijjhati uppajjanti ca me bhogā ye keci manaso piyā. || 819 ||

Vv_IV,11[=49].7 Akkhāmi te bhikkhu mahānubhāva manussabhūtā yam akāsi puññaṃ ten’ amhi evaṃ jalitānubhāvā vaṇṇo ca me sabbadisā pabhāsatī ti. || 820 ||

Vandanavimānaṃ

50 Rajjumālāvimānavatthu

Vv_IV,12[=50].1 Abhikkantena vaṇṇena yā tvaṃ tiṭṭhasi devate hatthe pāde ca viggayha naccasi suppavādite. || 821 ||

Vv_IV,12[=50].2 Tassā te naccamānāya aṅga-m-aṅgehi sabbaso dibbā saddā niccharanti savanīyā manoramā. || 822 ||

Vv_IV,12[=50].3 Tassā te naccamānāya aṅga-m-aṅgehi sabbaso dibbā gandhā pavāyanti sucigandhā manoramā. || 823 ||

Vv_IV,12[=50].4 Vivattamānā kāyena yā veṇīsu pilandhanā tesaṃ suyyati nigghoso turiye pañcaṅgike yathā. || 824 ||

Vv_IV,12[=50].5 Vaṭamsakā vātadhutā vātena sampakampitā tesaṃ suyyati nigghoso turiye pañcaṅgike yathā. || 825 ||

Vv_IV,12[=50].6 Yā pi te sirasmiṃ mālā sucigandhā manoramā vāti gandho disā sabbā rukkho mañjūsako yathā. || 826 ||

(073) Vv_IV,12[=50].7 Ghāyase taṃ sucigandhaṃ rūpaṃ passasi amānusaṃ devate pucchitācikkha kissa kammass’ idaṃ phalan ti. || 827 ||

Vv_IV,12[=50].8 Dāsī ahaṃ pure āsiṃ Gayāyaṃ brāhmaṇass' ahaṃ appapuññā alakkhikā Rajjumālā ti maṃ vidū. || 828 ||

Vv_IV,12[=50].9 Akkosānaṃ vadhānañ ca tajjanāya ca ukkatā kuṭaṃ gahetvā nikkhamma gacchiṃ udakahāriyā. || 829 ||

Vv_IV,12[=50].10 Vipathe kuṭaṃ nikkhipitvā vanasaṇḍaṃ upāgamiṃ:

idh’ evāhaṃ marissāmi kvattho pi jīvitena me. || 830 ||

Vv_IV,12[=50].11 Daḷhaṃ pāsaṃ karitvāna āsumbhitvāna pādape tato disā vilokesiṃ: ko nu kho vanam assito. || 831 ||

Vv_IV,12[=50].12 Tatth’ addasāsiṃ sambuddhaṃ sabbalokahitaṃ muniṃ nisinnaṃ rukkhamūlasmiṃ jhāyantaṃ akutobhayaṃ. || 832 ||

Vv_IV,12[=50].13 Tassā me ahu saṃvego abbhuto lomahaṃsano:

ko nu kho vanam assito manusso udāhu devatā. || 833 ||

Vv_IV,12[=50].14 Pāsādikaṃ pasādanīyaṃ vanā nibbanam āgataṃ disvā mano me pasīdi, nāyaṃ yādisak’ īdiso. || 834 ||

Vv_IV,12[=50].15 Guttindriyo jhānarato abahiggatamānaso hito sabbassa lokassa buddho so 'yaṃ bhavissati. || 835 ||

Vv_IV,12[=50].16 Bhayabheravo durāsado sīho va guham assito dullabhāyaṃ dassanāya pupphaṃ odumbaraṃ yathā. || 836 ||

Vv_IV,12[=50].17 So maṃ mudūhi vācāhi ālapitvā tathāgato Rajjumāle ti maṃ voca saraṇaṃ gaccha tathāgataṃ. || 837 ||

Vv_IV,12[=50].18 Tāhaṃ giraṃ suṇitvāna nelaṃ atthavatiṃ suciṃ saṇhaṃ muduñ ca vagguñ ca sabbasokāpanūdanaṃ. || 838 ||

Vv_IV,12[=50].19 Kallacittañ ca maṃ ñatvā pasannaṃ suddhamānasaṃ hito sabbassa lokassa anusāsi tathāgato. || 839 ||

Vv_IV,12[=50].20 Idaṃ dukkhan ti maṃ voca ayaṃ dukkhassa sambhavo ayaṃ nirodho maggo ca añjaso amatogadho. || 840 ||

Vv_IV,12[=50].21 Anukampakassa kusalassa ovādamhi ahaṃ ṭhitā ajjhagā amataṃ santiṃ nibbānaṃ padam accutaṃ. || 841 ||

Vv_IV,12[=50].22 Sāhaṃ avaṭṭhitā pemā dassane avikampinī mūlajātāya saddhāya dhītā buddhassa orasā. || 842 ||

(074) Vv_IV,12[=50].23 Sāhaṃ ramāmi kīḷāmi modāmi akutobhayā dibbaṃ mālaṃ dhārayāmi pivāmi madhu maddavaṃ. || 843 ||

Vv_IV,12[=50].24 Saṭṭhi turiyasahassāni paṭibodhaṃ karonti me:

Ālambo Gaggaro Bhīmo Sadhuvādī ca Saṃsayo || 844 ||

Vv_IV,12[=50].25 Pokkharo ca Suphasso ca Vīṇāmokkhā ca nāriyo Nandā c’ eva Sunandā ca Soṇadinnā Sucimhitā || 845 ||

Vv_IV,12[=50].26 Alambusā Missakesī ca Puṇḍarīkātidāruṇī Eṇiphassā Suphassā ca Subhaddā Muduvādinī || 846 ||

Vv_IV,12[=50].27 Etā c’ aññā ca seyyāse accharānaṃ pabodhikā tā maṃ kālen’ upāgantvā abhibhāsanti devatā: || 847 ||

Vv_IV,12[=50].28 Handa naccāma gāyāma handa taṃ ramayāmase na-y-idaṃ akatapuññānaṃ katapuññānam ev’ idaṃ. || 848 ||

Vv_IV,12[=50].29 Asokaṃ Nandanaṃ rammaṃ Tidasānaṃ mahāvanaṃ sukhaṃ akatapuññānaṃ idha natthi parattha ca sukhañ ca katapuññānaṃ idha c’ eva parattha ca. || 849 ||

Vv_IV,12[=50].30 Tesaṃ sahavyakāmānaṃ kattabbaṃ kusalaṃ bahuṃ katapuññā hi modanti sagge bhogasamaṅgino. || 850 ||

Vv_IV,12[=50].31 Bahunnaṃ vata atthāya uppajjanti tathāgatā dakkhiṇeyyā manussānaṃ puññakkhettānam ākarā yattha kāraṃ karitvāna sagge modanti dāyakā ti. || 851 ||

Rajjumālāvimānaṃ

(075) blank page

(076) Tass’ uddānaṃ:

Mañjeṭṭhā Pabhassarā nāgā Alomā kañjikadāyikā vihāra-caturitthambā pītā ucchu-vandana-Rajjumālā; vaggo tena pavuccatī ti.

Itthivimāne catuttho vaggo

MAÑJEṬṬHAKAVAGGO CATUTTHO

(077) 2 PURISAVIMĀNA

Permanent link

http://www2.hf.uio.no/common/apps/permlink/permlink.php?app=polyglotta&context=ctext&uid=4766c197-8d52-11e6-98cc-0050569f23b2

Go to Wiki Documentation
Enhet: Det humanistiske fakultet Utviklet av: IT-seksjonen ved HF

Choose languages

Choose images, etc.

Choose languages

Choose display