Bibliotheca Polyglotta

NEKKHAMMAPĀRAMITĀ

1 Yudhañjayacariyaṃ

Cp_III,1.1 Yadā ahaṃ amitayaso rājaputto Yudhañjayo

ussāvabinduṃ suriyātape patitaṃ disvāna saṃvijiṃ. || 242 ||

Cp_III,1.2 Tañ-ñevādhipatiṃ katvā saṃvegam- anubrūhayiṃ

mātāpitu ca vanditvā pabbajjam-anuyāc’ ahaṃ. || 243 ||

Cp_III,1.3 Yācanti maṃ pañjalikā sanegamā saraṭṭhakā:

ajj’ eva putta paṭipajja iddhaṃ phītaṃ mahāmahiṃ. || 244 ||

Cp_III,1.4 Sarājake sah’ orodhe sanegame saraṭṭhake

karuṇaṃ paridevante anapekkho pariccajiṃ. || 245 ||

Cp_III,1.5 Kevalaṃ paṭhavīrajjaṃ ñātiparijanaṃ yasaṃ

cajamāno na cintesiṃ bodhiyā-yeva kāraṇā. || 246 ||

Cp_III,1.6 Mātā pitā na me dessā na pi me dessaṃ mahāyasaṃ

sabbaññutaṃ piyaṃ mayhaṃ tasmā rajjaṃ pariccajin-ti. || 247 ||

Yudhañjayacariyaṃ paṭhamaṃ

2 Somanassacariyaṃ

Cp_III,2.1 Punāparaṃ yadā homi Indapatte pur’ uttame

kāmito dayito putto Somanasso ti vissuto, || 248 ||

Cp_III,2.2 Sīlavā guṇasampanno kalyāṇapaṭibhānavā

vuddhāpacāyī hirimā saṅgahesu ca kovido. || 249 ||

(025) Cp_III,2.3 Tassa rañño patikaro ahosi kuhakatāpaso

ārāmaṃ mālāvacchañca ropayitvāna jīvati. || 250 ||

Cp_III,2.4 Tam-ahaṃ disvāna kuhakaṃ thusarāsiṃ va ataṇḍulaṃ

dumaṃ anto va susiraṃ kadaliṃ va asārakaṃ, || 251 ||

Cp_III,2.5 Natthi’ massa sataṃ dhammo sāmaññāpagato ayaṃ

hirisukkadhammajahito jīvitavuttikāraṇā. || 252 ||

Cp_III,2.6 Kupito ahosi paccanto aṭavīhi parantihi

taṃ nisedhetuṃ gacchanto anusāsi pitā mamaṃ: || 253 ||

Cp_III,2.7 Mā pamajji tuvaṃ tāta jaṭilaṃ uggatāpanaṃ

yad-icchakaṃ pavattehi sabbakāmadado hi so. || 254 ||

Cp_III,2.8 Tam-ahaṃ gantvān’ upaṭṭhānaṃ idaṃ vacanam-abraviṃ:

kacci te gahapati kusalaṃ kiṃ vā te āharīyatu. || 255 ||

Cp_III,2.9 Tena so kupito āsi kuhako mānanissito:

ghātāpemi tuvaṃ ajja raṭṭhā pabbājayāmi vā. || 256 ||

Cp_III,2.10 Nisedhayitvā paccantaṃ rājā kuhakam-abravī:

kacci te bhante khamanīyaṃ sammāno te pavattito.

Tassa ācikkhatī pāpo kumāro yathā nāsiyo. || 257 ||

Cp_III,2.11 Tassa taṃ vacanaṃ sutvā āṇāpesi mahīpati:

sīsaṃ tatth’ eva chinditvā katvāna catukhaṇḍikaṃ

rathiyā rathiyaṃ dassetha, sā gati jaṭilahīḷitā. || 258 ||

Cp_III,2.12 Tattha kāraṇikā gantvā caṇḍā luddā akāruṇā

mātu aṅke nisinnassa ākaḍḍhitvā nayanti maṃ. || 259 ||

Cp_III,2.13 Tes’ āhaṃ evam-avacaṃ: bandhataṃ gāḷhabandhanaṃ

rañño dassetha maṃ khippaṃ rājakiriyāni atthi me. || 260 ||

Cp_III,2.14 Te maṃ rañño dassayiṃsu pāpassa pāpasevino

disvāna taṃ saññāpesiṃ mamañca vasam-ānayiṃ. || 261 ||

Cp_III,2.15 So maṃ tattha khamāpesi mahārajjam-adāsi me

so’ haṃ tamaṃ dālayitvā pabbajiṃ anagāriyaṃ. || 262 ||

Cp_III,2.16 Na me dessaṃ mahārajjaṃ kāmabhogo na dessiyo

sabbaññutaṃ piyaṃ mayhaṃ tasmā rajjaṃ pariccajin-ti. || 263 ||

Somanassacariyaṃ dutiyaṃ

(026) 3 Ayogharacariyaṃ

Cp_III,3.1 Punāparaṃ yadā homi Kāsirājassa atrajo

ayogharamhi saṃvaḍḍho nāmen’ āsi Ayogharo. || 264 ||

Cp_III,3.2 Dukkhena jīvito laddho sampīḷe patiposito

ajj’ eva putta paṭipajja kevalaṃ vasudhaṃ imaṃ. || 265 ||

Cp_III,3.3 Saraṭṭhakaṃ sanigamaṃ sajanaṃ vanditvā khattiyaṃ

añjaliṃ paggahetvāna idaṃ vacanam-abraviṃ: || 266 ||

Cp_III,3.4 Ye keci mahiyā sattā hīna-m-ukkaṭṭhamajjhimā

nirārakkhā sake gehe vaḍḍhanti sakañātibhi. || 267 ||

Cp_III,3.5 Idaṃ loke uttariyaṃ sampīḷe mama posanaṃ

ayogharamhi saṃvaḍḍho appabhe candasūriye. || 268 ||

Cp_III,3.6 Pūtikuṇapasampuṇṇā muccitvā mātu kucchito

tato ghoratare dukkhe puna pakkhitt’ ayoghare. || 269 ||

Cp_III,3.7 Yadi’ haṃ tādisaṃ patvā dukkhaṃ paramadāruṇaṃ

rajjesu yadi rajjāmi pāpānaṃ uttamo siyaṃ. || 270 ||

Cp_III,3.8 Ukkaṇṭhito’ mhi kāyena rajjena’ mhi anatthiko

nibbutiṃ pariyesissaṃ yattha maṃ Maccu na maddiye. || 271 ||

Cp_III,3.9 Ev’ āhaṃ cintayitvāna viravantaṃ mahājanaṃ

nāgo va bandhanaṃ chetvā pāvisiṃ kānanaṃ vanaṃ. || 272 ||

Cp_III,3.10 Mātā pitā na me dessā na pi me dessaṃ mahāyasaṃ

sabbaññutaṃ piyaṃ mayhaṃ tasmā rajjaṃ pariccajin-ti. || 273 ||

Ayogharacariyaṃ tatiyaṃ

(027) 4 Bhisacariyaṃ

Cp_III,4.1 Punāparaṃ yadā homi Kāsīnaṃ puravar’ uttame

bhaginī bhātaro satta nibbattā sotthiye kule. || 274 ||

Cp_III,4.2 Etesaṃ pubbajo āsiṃ hirisukka-m-upāgato

bhavaṃ disvāna bhayato nekkhammābhirato ahaṃ. || 275 ||

Cp_III,4.3 Mātāpitūhi pahitā sahāyā ekamānasā

kāmehi maṃ nimantenti: kulavaṃsaṃ dharehi ti3. || 276 ||

Cp_III,4.4 Yaṃ tesaṃ vacanaṃ vuttaṃ gihīdhamme sukhāvahaṃ

tam-me ahosi kaṭhinaṃ tattaphālasamaṃ viya. || 277 ||

Cp_III,4.5 Te maṃ tadā ukkhipantaṃ pucchiṃsu patthitaṃ mama:

kiṃ tvaṃ patthayasi samma yadi kāme na bhuñjasi. || 278 ||

Cp_III,4.6 Tes’ āhaṃ evam-avacaṃ attakāmo hitesinaṃ:

nāhaṃ patthemi gihībhāvaṃ nekkhammābhirato ahaṃ. || 279 ||

Cp_III,4.7 Te mayhaṃ vacanaṃ sutvā pitu mātu ca sāvayuṃ

mātā pitā evam-āhu: sabbe va pabbajāma bho. || 280 ||

Cp_III,4.8 Ubho mātā pitā mayhaṃ bhaginū ca satta bhātaro

amitadhanaṃ chaḍḍayitvā pavisimhā mahāvanan-ti. || 281 ||

Bhisacariyaṃ catutthaṃ

(028) 5 Soṇapaṇḍitacariyaṃ

Cp_III,5.1 Punāparaṃ yadā homi nagare Brahmavaḍḍhane

tattha kulavare seṭṭhe mahāsāle ajāy’ ahaṃ. || 282 ||

Cp_III,5.2 Tadā pi lokaṃ disvāna andhabhutaṃ tam’ otthaṭaṃ

cittaṃ bhavato patikuṭati tuttavegahataṃ viya. || 283 ||

Cp_III,5.3 Disvāna vividhaṃ pāpaṃ evaṃ cintes’ ahaṃ tadā:

kadā’ haṃ gehā nikkhamma pavisissāmi kānanaṃ. || 284 ||

Cp_III,5.4 Tadā pi maṃ nimantiṃsu kāmabhogehi ñātayo

tesam-pi chandam-ācikkhiṃ: mā nimantetha tehi maṃ. || 285 ||

Cp_III,5.5 Yo me kaniṭṭhako bhātā Nando namāsi paṇḍito

so pi maṃ anusikkhanto pabbajjaṃ samarocayi. || 286 ||

Cp_III,5.6 Ahaṃ Soṇo ca Nando ca ubho mātā pitā mama

tadā pi bhoge chaḍḍetvā pāvisimha mahāvanan-ti. || 287 ||

Soṇapaṇḍitacariyaṃ pañcamaṃ

Nekkhammapāraminiddeso niṭṭhito.

Permanent link

http://www2.hf.uio.no/common/apps/permlink/permlink.php?app=polyglotta&context=ctext&uid=5f2c8ca5-8d51-11e6-98cc-0050569f23b2

Choose languages

Choose images, etc.

Choose languages

Choose display