Paṭis_I,II.17: ‘Yaṃ vedanaṃ paṭicca . . . pe . . . yaṃ saññaṃ paṭicca . . . pe . . . yaṃ saṅkhāre paṭicca . . . pe . . . yaṃ viññāṇaṃ paṭicca . . . pe . . . yaṃ cakkhuṃ paṭicca . . . pe . . . yaṃ sotaṃ paṭicca, yaṃ ghānaṃ paṭicca, yaṃ jivhaṃ paṭicca, yaṃ kāyaṃ paṭicca, yaṃ manaṃ paṭicca, yaṃ rūpe paṭicca, yaṃ sadde paṭicca, yaṃ gandhe paṭicca, yaṃ rase paṭicca, yaṃ phoṭṭhabbe paṭicca, yaṃ dhamme paṭicca, yaṃ cakkhuviññāṇaṃ paṭicca, yaṃ sotaviññāṇaṃ paṭicca, yaṃ ghānaviññāṇaṃ paṭicca, yaṃ jivhāviññāṇaṃ paṭicca, yaṃ kāyaviññāṇaṃ paṭicca, yaṃ manoviññāṇaṃ paṭicca, yaṃ cakkhusamphassaṃ paṭicca, yaṃ sotasamphassaṃ paṭicca, yaṃ ghānasamphassaṃ paṭicca, yaṃ jivhāsamphassaṃ paṭicca, yaṃ kāyasamphassaṃ paṭicca, yaṃ manosamphassaṃ paṭicca, yaṃ cakkhusamphassajaṃ vedanaṃ paṭicca, yaṃ sotasamphassajaṃ vedanaṃ paṭicca, yaṃ ghānasamphassajaṃ vedanaṃ paṭicca, yaṃ jivhāsamphassajaṃ vedanaṃ paṭicca, yaṃ kāyasamphassajaṃ vedanaṃ paṭicca, yaṃ manosamphassajaṃ vedanaṃ paṭicca uppajjati sukhaṃ somanassaṃ, ayaṃ manosamphassajāya vedanāya assādo’ ti abhinivesaparāmāso diṭṭhi.
Diṭṭhi na assādo, assādo na diṭṭhi;
yā ca diṭṭhi yo ca assādo, (142) ayaṃ vuccati assādadiṭṭhi.
Assādadiṭṭhi micchādiṭṭhi, micchādiṭṭhi diṭṭhivipatti;
tāya diṭṭhivipaṭṭiyā samannāgato puggalo diṭṭhivipanno, diṭṭhivipanno puggalo na sevitabbo na bhajitabbo na payirūpāsitabbo, Taṃ kissa hetu?
Yā diṭṭhi yo rāgo, so na diṭṭhi, diṭṭhi na rāgo;
yā ca diṭṭhi yo ca rāgo, ayaṃ vuccati diṭṭhirāgo;
tāya ca diṭṭhiyā tena ca rāgena samannāgato puggalo diṭṭhirāgaratto, diṭṭhirāgaratte puggale dinnaṃ dānaṃ na mahapphalaṃ hoti na mahānisaṃsaṃ.
Assādadiṭṭhi micchādiṭṭhi, micchādiṭṭhikassa purisapuggalassa dve ’va gatiyo, nirayo vā tiracchānayoni vā.
Micchādiṭṭhikassa purisapuggalassa yañ c’ eva kāyakammaṃ yathādiṭṭhisamattaṃ samādinnaṃ, yañ ca vacīkammaṃ . . . pe . . . yañ ca manokammaṃ yathādiṭṭhisamattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti.
Seyyathāpi nimbabījaṃ vā kosatakibījaṃ vā tittakalābubījaṃ vā allāya paṭhaviyā nikkhittaṃ yañ c’ eva pathavīrasaṃ upādiyati yañ ca āporasaṃ upādiyati sabban taṃ tittakatāya kaṭukatāya asāratāya saṃvattati.
Evameva micchādiṭṭhikassa purisapuggalassa yañ c’ eva kāyakammaṃ yathādiṭṭhisamattaṃ samādinnaṃ yañ ca vacīkammaṃ . . . pe . . . yañ ca manokammaṃ yathādiṭṭhisamattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti.
Assādadiṭṭhi micchādiṭṭhi, micchādiṭṭhi diṭṭhigataṃ diṭṭhigahaṇaṃ diṭṭhikantāraṃ diṭṭhivisukaṃ diṭṭhivipphanditaṃ diṭṭhisaññojanaṃ diṭṭhisallaṃ diṭṭhisambādho diṭṭhi-(143)palibodho . . . pe . . . diṭṭhiparāmāso.
Imehi aṭṭhārasahi ākārehi pariyuṭṭhitacittassa saññogo.