de nas bcom ldan ’das la ’jam dpal gźon nur gyur pas ’di skad ces gsol to ||
bcom ldan ’das las kyi sgrib pa rnam par dag pa źes bya ba ji tsam gyis na las kyi sgrib pa rnam par dag par ’gyur |
bcom ldan ’das kyis bka’ stsal pa | ’jam dpal byaṅ chub sems dpa’ gaṅ chos thams cad las med ciṅ | rnam par smin pa med par śes pa des las kyi sgrib pa rnam par dag pa ’thob bo ||
’jam dpal gźan yaṅ byaṅ chub sems dpa’ gaṅ gis ’dod chags kyi mtha’ yaṅ dag pa’i mthar mthoṅ ba daṅ | źe sdaṅ gi mtha’ yaṅ dag pa’i mthar mthoṅ ba daṅ | gti mug gi mtha’ yaṅ dag pa’i mthar mthoṅ ba des las kyi sgrib pa rnam par dag pa ’thob bo ||
’jam dpal gźan yaṅ byaṅ chub sems dpa’ gaṅ gis sems can thams cad daṅ | chos thams cad mya ṅan las ’das pa’i dbyiṅs su mthoṅ ba des las kyis grib pa rnam par dag pa ’thob bo ||
’jam dpal de ci’i phyir źe na | lta ba yod na las mṅon par ’du byed par ’gyur te | ’jam dpal byis pa thos pa med pa so so’i skye bo ni chos thams cad śin tu yoṅs su mya ṅan las ’das par mi śes pas | bdag daṅ źan du dmigs so ||
dmigs nas lus daṅ | ṅag daṅ | yid kyis las rnam pa gsum mṅon par ’du byed de | de yaṅ dag pa ma yin par sgro ’dogs pas bdag ni ’dod chags so || bdag ni źe sdaṅ ṅo || bdag ni gti mug go źes rnam par rtog go ||
gal te de bźin gśegs pa’i bstan pa la rab tu byuṅ na | de ’di sñam du bdag ni tshul khrims daṅ ldan pa’o || bdag ni tshaṅs par spyod pa’o || bdag gis ni ’khor ba las yaṅ dag par ’da’ bar bya’o || bdag gis ni mya ṅan las ’das pa thob par bya’o || bdag gis ni sdug bsṅal las rnam par grol ba thob par bya’o sñam du sems śiṅ |
de yaṅ dag pa ma yin par sgro ’dogs pas | chos ’di dag ni dge ba’o || chos ’di dag ni mi dge ba’o || chos ’di dag ni yoṅs su śes par bya’o || chos ’di dag ni spaṅ bar bya’o || chos ’di dag ni mṅon du bya’o || chos ’di dag ni bsgom par bya’o || sdug bsṅal ni śes par bya’o || kun ’byuṅ ni spaṅ bar bya’o || ’gog pa ni mṅon du bya’o || lam ni bsgom par bya’o źes rnam par rtog go||
de ’du byed thams cad ni mi rtag pa’o || ’du byed thams cad ni sdug bsṅal ba’o || ’du byed thams cad ni kun nas ’bar ba’o ||
ci nas kyaṅ bdag ni ’du byed rnams las ’bros par bya’o sñam du rnam par rtog ste | de de ltar rtog pa’i tshe | skyo ba daṅ ldan pa’i ’du śes yid la byed pa | mtshan ma sṅon du btaṅ ba dag ’byuṅ ste | de ’di sñam du gaṅ ’di chos rnams yoṅs su śes pa ’di ni sdug bsṅal yoṅs su śes pa’o ||
de ’di sñam du ji nas kyaṅ bdag gis kun ’byuṅ ba spaṅ bar bya’o źes de chos thams cad la ṅo mi mtho źiṅ khrel bar sems | ’jigs pa daṅ | rab tu ’jigs pa daṅ | yoṅs su ’jigs pa skyed ciṅ | de ’di sñam du gaṅ ’di chos de dag las ṅo tsha bar gyur pa de ni kun ’byuṅ ba spaṅ ba’o sñam du sems so ||
de ’di sñam du ci nas kyaṅ bdag gis ’gog pa mṅon du bya’o sñam nas | de chos de dag rnam par brtags nas de’i ’og tu de dag ’gog par ’du śes śiṅ | de ’di sñam du gaṅ chos rnams mṅon du bya ba de ni ’gog pa yin no sñam mo ||
de ’di sñam du ci nas kyaṅ bdag gis lam bsgom par bya’o sñam ste | de gcig pu dben par soṅ nas chos de dag yid la byas pas źi gnas ’thob ste | de’i skyo ba daṅ ldan pa’i yid la bya ba de daṅ | źi gnas thob pa des chos thams cad las sems rab tu źum par ’gyur ||
sems rab tu ’god par ’gyur | sems phyir ldog par ’gyur źiṅ ṅo mi mtho ste | ṅo tsha la rnam par smod de | mṅon par dga’ ba med pa skyed do ||
de ’di sñam du bdag ni sdug bsṅal thams cad las grol ba ste | bdag gis de las goṅ du bya ba gźan med do || bdag ni dgra bcom pa yin no źes dam ’cha’o ||
de ’chi ba’i dus la bab pa’i tshe | bdag skye bar ’gyur ba mthoṅ nas | saṅs rgyas kyi byaṅ chub la nem nur daṅ the tsom du gyur te | de the tsom du ltuṅ ba’i sems kyis dus byas nas sems can dmyal ba chen po dag tu skye ste | de yaṅ ma skyes pa’i chos rnams la rnam par brtags pa’i phyir ro ||
