|| bam po gñis pa || || de nas bcom ldan ’das la ’jam dpal gźon nur gyur pas ’di skad ces gsol to || bcom ldan ’das ’phags pa’i bden pa bźi po rnams ji ltar blta bar bgyi | bcom ldan ’das kyis bka’ stsal pa | ’jam dpal gaṅ gis ’du byed thams cad ma skyes par mthoṅ ba des sdug bsṅal yoṅs su śes so || gaṅ gis chos thams cad ’byuṅ ba med par mthoṅ ba des kun ’byuṅ ba rab tu spaṅs so || gaṅ gis chos thams cad śin tu mya ṅan las ’das par mthoṅ ba des ’gog pa mṅon du byas so || gaṅ gis chos thams cad dṅos po med par mthoṅ ba des lam bsgoms so || ’jam dpal gaṅ gis ’phags pa’i bden pa bźi de ltar mthoṅ ba de ni | chos ’di dag ni dge ba’o || chos ’di dag ni mi dge ba’o || chos ’di dag ni yoṅs su śes par bya ba’o || chos ’di dag ni spaṅ bar bya ba’o || chos ’di dag ni mṅon du bya ba’o || chos ’di dag ni bsgom par bya ba’o || sdug bsṅal ni yoṅs su śes par bya ba’o || kun ’byuṅ bani spaṅ bar bya ba’o || ’gog pa ni mṅon du bya ba’o || lam ni bsgom par bya ba’o źes mi rtog rnam par mi rtog go || de ci’i phyir źe na | chos gaṅ dag la byis pa so so’i skye bo dag ’dod chags pa daṅ |źe sdaṅ ba daṅ | gti mug par ’gyur ba’i chos de dag des ma skyes pa daṅ | med pa daṅ | nor ba daṅ | yoṅs su brtags pa daṅ | yoṅs su bskyed par mthoṅ ba’i phyir te | de chos gaṅ yaṅ mi len mi ’dor ro || de’i sems ni khams gsum pa la chags pa med de | khams gsum pa thams cad ma skyes pa daṅ | sgyu ma lta bu daṅ | rmi lam lta bu daṅ | brag ca lta bu daṅ | mig yor lta bur yaṅ dag par mthoṅ ṅo|| des dge ba daṅ | mi dge ba’i chos thams cad smig rgyu lta bur mthoṅ ste | des ’dod chags kyi khams mya ṅan las ’das pa’i dbyiṅs su mthoṅ ṅo || de bźin du źe sdaṅ gi khams daṅ | gti mug gi khams mya ṅan las ’das pa’i dbyiṅs su mthoṅ ṅo || des chos rnams de lta bu’i raṅ bźin du mthoṅ bas | sems can thams cad la chags pa daṅ | khoṅ khro ba med par ’gyur ro || de ci’i phyir źe na | des gaṅ la chags par bya ba daṅ | khoṅ khro bar bya ba de lta bu’i chos mi dmigs so || de nam mkha’ daṅ mñam pa’i sems kyis saṅs rgyas kyaṅ yaṅ dag par rjes su mi mthoṅ ṅo || chos daṅ dge ’dun yaṅ dag par rjes su mi mthoṅ ṅo || de chos thams cad yaṅ dag par rjes su mi mthoṅ bas chos gaṅ la yaṅ the tsom mi skyed de | the tsom med pas ñe bar len pa med do || ñe bar len pa med pas ñe bar len pa med par yoṅs su mya ṅan las ’das te | ’jam dpal de lta bu’i chos śes pas gnas brtan rab ’byor de bźin gśegs pa’i źabs la phyag ’tshal du mi ’oṅ ṅo || de ci’i phyir źe na | bdag ñid kyaṅ mi dmigs na | de bźin gśegs pa dmigs pa lta smos su ga la yod de | de ni gnas med do ||
