’od srung ’di lta ste dper na lha dang bcas pa’i ’jig rten gyis mching bu’i nor bu byi dor byas kyang mching bu’i nor bu nam yang nor bu rin po che bai dūrya ra mi ’gyur ro || ’od srung de bzhin du nyan thos tshul khrims dang || bslabs pa dang | sbyangs pa’i yon tan dang | yo byad bsnyungs pa dang | ting nge ’dzin thams cad dang ldan yang byang chub kyi snying po la ’dug ste bla na med pa yang dag par rdzogs pa’i byang chub mngon par rdzogs par ’tshang rgya bar nam yang mi ’gyur ro || de la ’di skad ces bya ste | dper na lha dang bcas pa’i ’jig rten gyis || mching bu’i nor bu byi dor byas kyang ni | | mching bu dag ste bai dūrya ra mi ’gyur || ’di ’dra de nyid de’i rang bzhin yin | | de bzhin nyan thos khrims dang thos pa dang || bsam gtan ldan zhing sbyangs pa kun ldan yang | | byang chub snying por ’dug ste bdud btul nas || byang chub reg ste bde gshegs ’gyur ba med ||