de nas bcom ldan ’das kyis tshe dang ldan pa rab ’byor la bka’ stsal pa | rab ’byor khyod song la dge slong de dag kun shes par byos shog | rab ’byor gyis gsol pa | bcom ldan ’das nyid kyis ’di dag la bshad na yang ’thun par mi bgyid na bdag la lta smos kyang ci ’tshal | de nas bcom ldan ’das kyis dge slong de dag lam gang nas ’dong ba’i lam der dge slong gnyis shig sprul pa sprul to || de nas dge slong lnga brgya bo de dag sprul pa’i dge slong de gnyis lam gang nas ’dong ba’i lam der dong ste phyin pa dang ’di skad ces smras so || tshe dang ldan pa dag gar ’dong || de gnyis kyis smras pa | kho bo cag ni dgon pa’i gnas rnams su bsam gtan gyi bde ba la reg par gnas par bya bar ’dong ngo || de ci’i phyir zhe na | kho bo cag ni bcom ldan ’das kyis chos bstan pa gang yin pa’i chos bstan pa de la mi ’jug ste | ma rtogs ma mos shing skrag ste kun tu dngangs | kun tu rab tu dngangs par gyur nas kho bo cag dgon pa’i gnas rnams su bsam gtan gyi bde ba la reg par gnas pa rnams kyis gnas par bya’o ||