Bibliotheca Polyglotta

(042) CHANIPĀTO.

Disvāna pāṭihīrāni Gotamassa yasassino na tāvāhaṃ paṇipatiṃ issāmānena vañcito. || Th_375 ||

mama saṃkappam aññāya codesi narasārathi, tato me āsi saṃvego abbhuto lomahaṃsano. || Th_376 ||

pubbe jaṭilabhūtassa yā me iddhi parittikā, tāhaṃ tadā niraṃkatvā pabbajiṃ jinasāsane. || Th_377 ||

pubbe yaññena santuṭṭho kāmadhātupurakkhato, pacchā rāgañ ca dosañ ca mohañ cāpi samūhaniṃ. || Th_378 ||

pubbenivāsaṃ jānāmi, dibbacakkhuṃ visodhitaṃ, iddhimā paracittaññū dibbasotañ ca pāpuṇiṃ. || Th_379 ||

yassa c’ atthāya pabbajito agārasmā anagāriyaṃ, so me attho anuppatto sabbasaṃyojanakkhayo 'ti. || Th_380 ||

Uruveḷakassapo thero.

Atihitā vīhi, khalagatā sāli, na ca labhe piṇḍaṃ, katham ahaṃ kassaṃ. || Th_381 ||

buddham appameyyaṃ anussara, pasanno pītiyā phuṭasarīro hohisi satatam udaggo. || Th_382 ||

dhammam appameyyaṃ --pa-- saṃgham appameyyaṃ --pa-- || Th_383-384 ||

abbhokāse viharasi, sītā hemantikā imā rattiyo.

mā sītena pareto vihaññittho; pavisa tvaṃ vihāraṃ phusit aggaḷaṃ. || Th_385 ||

phusissaṃ catasso appamaññāyo tāhi ca sukhito viharissaṃ; nāhaṃ sītena vihaññissaṃ aniñjito viharanto 'ti. || Th_386 ||

Tekicchakāni thero.

(043) Yassa sabrahmacārīsu gāravo n’ ūpalabbhati, parihāyati saddhammā maccho appodake yathā. || Th_387 ||

yassa sabrahmacārīsu ... na virūhati saddhamme khette bījaṃ va pūtikaṃ. || Th_388 ||

yassa sabrahmacārīsu ... ārakā hoti nibbānā dhammarājassa sāsane. || Th_389 ||

yassa sabrahmacārīsu gāravo upalabbhati, na vihāyati saddhammā maccho bavhodake yathā. || Th_390 ||

yassa ... so virūhati saddhamme khette bījaṃ va bhaddakaṃ. || Th_391 ||

yassa ... santike hoti nibbānaṃ dhammarājassa sāsane 'ti. || Th_392 ||

Mahānāgo thero.

Kullo sīvathikaṃ gantvā addasaṃ itthiṃ ujjhitaṃ apaviddhaṃ susānasmiṃ khajjantiṃ kimihī phuṭaṃ. || Th_393 ||

āturaṃ asuciṃ pūtiṃ passa Kulla samussayaṃ uggharantaṃ paggharantaṃ bālānaṃ abhinanditaṃ. || Th_394 ||

dhammādāsaṃ gahetvāna ñāṇadassanapattiyā paccavekkhiṃ imaṃ kāyaṃ tucchaṃ santarabāhiraṃ. || Th_395 ||

yathā idaṃ tathā etaṃ, yathā etaṃ tathā idaṃ, yathā adho tathā uddhaṃ, yathā uddhaṃ tathā adho. || Th_396 ||

yathā divā tathā rattiṃ, yathā rattiṃ tathā divā, yathā pure tathā pacchā, yathā pacchā tathā pure. || Th_397 ||

pañcaṅgikena turiyena na rati hoti tādisī yathā ekaggacittassa sammā dhammaṃ vipassato 'ti. || Th_398 ||

Kullo thero.

Manujassa pamattacārino taṇhā vaḍḍhati māḷuvā viyā, so palavatī hurāhuraṃ phalam icchaṃ va vanasmi vā naro. || Th_399 ||

yaṃ esā sahatī jammī taṇhā loke visattikā, sokā tassa pavaḍḍhanti abhivaḍḍhaṃ va bīraṇaṃ. || Th_400 ||

yo ve taṃ sahatī jammiṃ taṇhaṃ loke duraccayaṃ, sokā tamhā papatanti udabindu va pokkharā. || Th_401 ||

(044) taṃ vo vadāmi bhaddaṃ vo yāvant’ ettha samāgatā: taṇhāya mūlaṃ khaṇatha usīrattho va bīraṇaṃ, mā vo naḷaṃ va soto va Māro bhañji punappunaṃ. || Th_402 ||

karotha buddhavacanaṃ, khaṇo ve mā upaccagā, khaṇātītā hi socanti nirayamhi samappitā. || Th_403 ||

pamādo rajo, pamādānupatito rajo; appamādena vijjāya abbahe sallam attano 'ti. || Th_404 ||

Māluṅkyaputto thero.

Paṇṇavīsativassāni yato pabbajito ahaṃ accharāsaṃghātamattam pi cetosantim anajjhagaṃ. || Th_405 ||

aladdhā cittass’ ekaggaṃ kāmarāgena addito bāhā paggayha kandanto vihārān upanikkhamiṃ. || Th_406 ||

satthaṃ vā āharissāmi, ko attho jīvitena me, kathaṃ hi sikkhaṃ paccakkhaṃ kālaṃ kubbetha mā diso. || Th_407 ||

tadāhaṃ khuram ādāya mañcakamhi upāvisiṃ; parinīto khuro āsi dhamaniṃ chettum attano. || Th_408 ||

tato me ... (409,410 = 269,270) || Th_409-410 ||

Sappadāsatthero.

Uṭṭhāhi nisīda Kātiyāna mā niddābahulo ahu jāgarassu, mā taṃ alasaṃ pamattabandhu kūṭeneva jinātu maccu rājā. || Th_411 ||

sayathāpi mahāsamuddavego evaṃ jātijarātivattate taṃ, so karohi sudīpam attano tvaṃ, na hi tāṇaṃ tava vijjateva aññaṃ. || Th_412 ||

satthā hi vijesi maggam etaṃ saṅgā jātijarābhayā atītaṃ; pubbāpararattam appamatto anuyuñjassu daḷhaṃ karohi yogaṃ. || Th_413 ||

purimāni pamuñca bandhanāni saṃghāṭīkhuramuṇḍabhi kkhabhojī, mā khiḍḍāratiñ ca mā niddaṃ anuyuñjittha jhiyāya Kātiyāna. || Th_414 ||

(045) jhāyāhi jināhi Kātiyāna, yogakkhemapathe sukovido 'si; pappuyya anuttaraṃ visuddhiṃ parinibbāhisi vārinā va joti. || Th_415 ||

pajjotakaro paritaraṃso vātena vinamyate latā va; evam pi tuvaṃ anādiyāno Māraṃ Indasagotta niddhunāhi.

so vedayitāsu vītarāgo kālaṃ kaṅkha idh’ eva sītibhūto 'ti. || Th_416 ||

Kātiyāno thero.

Sudesito cakkhumatā buddhenādiccabandhunā sabbasaṃyojanātīto sabbavaṭṭavināsano || Th_417 ||

niyyāniko uttaraṇo taṇhāmūlavisosano, visamūlaṃ āghātanaṃ chetvā pāpeti nibbutiṃ, || Th_418 ||

aññāṇamūlabhedāya kammayantavighāṭano viññāṇānaṃ pariggahe ñāṇavajiranipātano || Th_419 ||

vedanānaṃ viññāpano upādānappamocano bhavaṃ aṅgārakāsuṃ va ñāṇena anupassako || Th_420 ||

mahāraso sugambhīro jarāmaccunivāraṇo ariyo aṭṭhaṅgiko maggo dukkhūpasamano sivo || Th_421 ||

kammaṃ kamman ti ñatvāna vipākañ ca vipākato paṭiccuppannadhammānaṃ yathāvālokadassano mahākhemaṃgamo santo pariyosānabhaddako 'ti. || Th_422 ||

Migajālo thero.

Jātimadena matto 'haṃ bhogaissariyena ca saṇṭhāṇavaṇṇarūpena madamatto acāri 'haṃ. || Th_423 ||

nāttano samakaṃ kañci atirekaṃ ca maññisaṃ atimānahato bālo patthaddho ussitaddhajo. || Th_424 ||

mātaraṃ pitarañ cāpi aññe pi garusammate na kañci abhivādesiṃ mānatthaddho anādaro. || Th_425 ||

disvā vināyakaṃ aggaṃ sārathīnaṃ varuttamaṃ tapantam iva ādiccam bhikkhusaṃghapurakkhataṃ || Th_426 ||

mānaṃ madañ ca chaḍḍetvā vippasannena cetasā sirasā abhivādesiṃ sabbasattānam uttamaṃ. || Th_427 ||

(046) atimāno ca omāno pahīnā susamūhatā; asmimāno samucchinno, sabbe mānavidhā hatā 'ti. || Th_428 ||

Jento purohitaputto thero.

Yadā navo pabbajito jātiyā sattavassiko, iddhiyā abhibhotvāna pannagindaṃ mahiddhikaṃ || Th_429 ||

upajjhayassa udakaṃ Anotattā mahāsarā āharāmi, tato disvā maṃ satthā etad abravī: || Th_430 ||

Sāriputta imaṃ passa āgacchantaṃ kumārakaṃ udakumbhakam ādāya ajjhattaṃ susamāhitaṃ. || Th_431 ||

pāsādikena vattena kalyāṇairiyāpatho sāmaṇero 'nuruddhassa iddhiyā ca visārado, || Th_432 ||

ājāniyena ājañño sādhunā sādhukārito vinīto Anuruddhena katakiccena sikkhito: || Th_433 ||

so patvā pāramaṃ santiṃ sacchikatvā akuppataṃ sāmaṇero sa Sumano mā maṃ jaññā 'ti icchatīti. || Th_434 ||

Sumano thero.

Vātarogābhinīto tvaṃ viharaṃ kānane vane paviddhagocare lūkhe kathaṃ bhikkhu karissasi. || Th_435 ||

pūtisukhena vipulena pharitvāna samussayaṃ lūkham pi abhisambhonto viharissāmi kānane. || Th_436 ||

bhāvento satta bojjhaṅge indriyāni balāni ca jhānasokhummasamupanno viharissaṃ anāsavo. || Th_437 ||

vippamuttaṃ kilesehi suddhacittaṃ anāvilaṃ abhiṇhaṃ paccavekkhanto viharissaṃ anāsavo. || Th_438 ||

ajjhattañ ca bahiddhā ca ye me vijjiṃsu āsavā sabbe asesā ucchinnā na ca uppajjare puna. || Th_439 ||

pañca kkhandhā pariññātā tiṭṭhanti chinnamūlakā, dukkhakkhayo anuppatto, n’ atthi dāni punabbhavo 'ti. || Th_440 ||

Nhātakamuni thero.

Akkodhassa kuto kodho dantassa samajīvino sammadaññāvimuttassa upasantassa tādino. || Th_441 ||

(047) tass’ eva tena pāpiyyo yo kudhaṃ paṭikujjhati; kuddhaṃ appaṭikujjhanto saṃgāmaṃ jeti dujjayaṃ. || Th_442 ||

ubhinnam atthaṃ carati attano ca parassa ca, paraṃ saṃkupitaṃ ñatvā yo sato upasammati. || Th_443 ||

ubhinnaṃ tikicchantan taṃ attano ca parassa ca janā maññanti bālo 'ti ye dhammassa akovidā. || Th_444 ||

uppajjate sace kodhe, āvajja kakacūpamaṃ; uppajje ce rase taṇhā, puttamaṃsūpamaṃ sara. || Th_445 ||

sace dhāvati te cittaṃ kāmesu ca bhavesu ca, khippaṃ niggaṇha satiyā kiṭṭhādaṃ viya duppasun ti. || Th_446 ||

Brahmadatto thero.

Channam ativassati, vivaṭaṃ nātivassati: tasmā channaṃ vivaretha, evan taṃ nātivassati. || Th_447 ||

maccun’ abbhāhato loko, jarāya parivārito, taṇhāsallena otiṇṇo, icchādhūpāyito sadā. || Th_448 ||

maccun’ abbhāhato loko parikkhitto jarāya ca, haññati niccam attāṇo pattadaṇḍo va takkaro. || Th_449 ||

āgacchant’ aggikhandhā va maccubyādhijarā tayo, paccuggantuṃ balaṃ n’ atthi, javo n’ atthi palāyi tuṃ. || Th_450 ||

amoghaṃ divasaṃ kayirā appena bahukena vā; yaṃ yaṃ vijahate rattiṃ tadūnan tassa jīvitaṃ. || Th_451 ||

carato tiṭṭhato vāpi āsīnasayanassa vā upeti carimā ratti, na te kālo pamajjitun ti. || Th_452 ||

Sirimaṇḍo thero.

Dipādako 'yam asuci duggandho parihīrati nānākuṇapaparipūro vissavanto tato tato. || Th_453 ||

migaṃ nilīnaṃ kūṭena baliseneva ambujaṃ vānaraṃ viya lepena bādhayanti puthujjanaṃ || Th_454 ||

rūpā saddā rasā gandhā phoṭṭhabbā ca manoramā: pañca kāmaguṇā ete itthirūpasmiṃ dissare. || Th_455 ||

(048) ye etā upasevanti rattacittā puthujjanā, vaḍḍhenti kaṭasiṃ ghoraṃ ācinanti punabbhavaṃ. || Th_456 ||

yo vetā parivajjeti sappasseva padā siro, so 'maṃ visattikaṃ loke sato samativattati. || Th_457 ||

kāmesv ādīnavaṃ disvā nekkhammaṃ daṭṭhu khemato nissaṭo sabbakāmehi, patto me āsavakkhayo 'ti. || Th_458 ||

Sabbakāmo thero.

uddānaṃ: Uruveḷakassapo ca thero Tekicchakāni ca Mahānāgo ca Kullo ca Māluto Sappadāsako | Kātiyāno ca Migajālo Jento Sumanasavhayo Nhātamuni Brahmadatto Sirimaṇḍo Sabbakāmako.

gāthāyo caturāsīti, therā c’ ettha catuddasā 'ti.

Chanipāto niṭṭhito.

Permanent link

http://www2.hf.uio.no/common/apps/permlink/permlink.php?app=polyglotta&context=ctext&uid=0c9712c2-8d52-11e6-98cc-0050569f23b2

Go to Wiki Documentation
Enhet: Det humanistiske fakultet Utviklet av: IT-seksjonen ved HF

Choose languages

Choose images, etc.

Choose languages

Choose display