Bibliotheca Polyglotta

(052) AṬṬHANIPĀTO.

Kammaṃ bahukaṃ na kāraye, parivajjeyya janaṃ, na uyyame; so ussuko rasānugiddho atthaṃ riñcati yo sukhādhi vāho. || Th_494 ||

paṅko 'ti hi naṃ avedayuṃ yāyaṃ vandanapūjanā kulesu, sukhumaṃ sallaṃ durubbahaṃ, sakkāro kāpurisena dujjaho. || Th_495 ||

na parass’ upanidhāya kammaṃ maccassa pāpakaṃ attanā taṃ na seveyya, kammabandhū hi mātiyā. || Th_496 ||

na pare vacanā coro, na pare vacanā muni; attānañ ca yathā veti devāpi naṃ tathā vidu. || Th_497 ||

pare ca na vijānanti mayam ettha yamāmase; ye ca tattha vijānanti, tato sammanti medhagā. || Th_498 ||

jīvatevāpi sappañño api vittaparikkhayā, paññāya ca alābhena vittavāpi na jīvati. || Th_499 ||

sabbaṃ suṇāti sotena, sabbaṃ passati cakkhunā, na ca diṭṭhaṃ sutaṃ dhīro sabbam ujjhitum arahati. || Th_500 ||

cakkhum’ assa yathā andho, sotavā badhiro yathā, paññāv’ assa yathā mūgo, balavā dubbalor’ iva, atha atthe samuppanne sayetha matasāyikan ti. || Th_501 ||

Mahākaccāyano thero.

Akkodhano anupanāhī amāyo rittapesuṇo sa ve tādisako bhikkhu evaṃ pecca na socati. || Th_502 ||

akkodhano anupanāhī amāyo rittapesuṇo guttadvāro sadā bhikkhu evaṃ pecca na socati. || Th_503 ||

akkodhano ... kalyāṇasīlo yo bhikkhu evaṃ pecca na socati. || Th_504 ||

akkodhano ... kalyāṇamitto yo bhikkhu evaṃ pecca na socati. || Th_505 ||

(053) akkodhano ... kalyāṇapañño yo bhikkhu evaṃ pecca na socati. || Th_506 ||

yassa saddhā tathāgate acalā supatiṭṭhitā, sīlañ ca yassa kalyāṇaṃ ariyakantaṃ pasaṃsitaṃ, || Th_507 ||

saṃghe pasādo yass’ atthi ujubhūtañ ca dassanaṃ, adaḷiddo 'ti taṃ āhu, amoghan tassa jīvitaṃ. || Th_508 ||

tasmā saddhañ ca sīlañ ca pasādaṃ dhammadassanaṃ anuyuñjetha medhāvī saraṃ buddhāna sāsanan ti. || Th_509 ||

Sirimitto thero.

Yadā paṭhamam addakkhiṃ satthāraṃ akutobhayaṃ, tato me ahu saṃvego passitvā purisuttamaṃ. || Th_510 ||

siriṃ hatthehi pādehi yo paṇāmeyya āgataṃ, etādisaṃ so satthāraṃ ārādhetvā virādhaye. || Th_511 ||

tadāhaṃ puttadārañ ca dhanadhaññañ ca chaḍḍayiṃ, kesamassūni chedetvā pabbajiṃ anagāriyaṃ. || Th_512 ||

sikkhāsājīvasampanno indriyesu susaṃvuto namassamāno sambuddhaṃ vihāsiṃ aparājito. || Th_513 ||

tato me paṇidhī āsi cetaso abhipatthito: na nisīde muhuttam pi taṇhāsalle anūhate. || Th_514 ||

tassa mevaṃ viharato passa viriyaparakkamaṃ, tisso vijjā anuppattā, kataṃ buddhassa sāsanaṃ. || Th_515 ||

pubbenivāsaṃ jānāmi, dibbacakkhuṃ visodhitaṃ, arahā dakkhiṇeyyo 'mhi vippamutto nirūpadhi. || Th_516 ||

tato ratyā vivasane suriyass’ uggamanaṃ pati sabbaṃ taṇhaṃ visosetva pallaṅkena upāvisin ti. || Th_517 ||

Mahāpanthako thero.

uddānaṃ: Mahākaccāyano thero Sirimitto Mahāpanthako ete Aṭṭhanipātamhi, gāthāyo catuvīsatīti.

Aṭṭhanipāto niṭṭhito.

Permanent link

http://www2.hf.uio.no/common/apps/permlink/permlink.php?app=polyglotta&context=ctext&uid=0cc6ac79-8d52-11e6-98cc-0050569f23b2

Go to Wiki Documentation
Enhet: Det humanistiske fakultet Utviklet av: IT-seksjonen ved HF

Choose languages

Choose images, etc.

Choose languages

Choose display