Bibliotheca Polyglotta

(067) CUDDASANIPĀTO.

Yadā ahaṃ pabbajito agārasmā anagāriyaṃ nābhijānāmi saṃkappaṃ anariyaṃ dosasaṃhitaṃ. || Th_645 ||

ime haññantu vajjhantu dukkhaṃ pappontu pāṇino saṃkappaṃ nābhijānāmi imasmiṃ dīghamantare. || Th_646 ||

mettañ ca abhijānāmi appamāṇaṃ subhāvitaṃ anupubbaṃ paricitaṃ yathā buddhena desitaṃ. || Th_647 ||

sabbamitto sabbasakho sabbabhūtānukampako mettaṃ cittañ ca bhāvemi abyāpajjharato sadā. || Th_648 ||

asaṃhīraṃ asaṃkuppaṃ cittaṃ āmodayām’ ahaṃ, brahmavihāraṃ bhāvemi akāpurisasevitaṃ. || Th_649 ||

avitakkaṃ samāpanno sammāsambuddhasāvako ariyena tuṇhibhāvena upeto hoti tāvade. || Th_650 ||

yathāpi pabbato selo acalo suppatiṭṭhito, evaṃ mohakkhayā bhikkhu pabbato va na vedhati. || Th_651 ||

anaṅgaṇassa posassa niccaṃ sucigavesino vālaggamattaṃ pāpassa abbhāmattaṃ va khāyati. || Th_652 ||

nagaraṃ yathā paccantaṃ guttaṃ santarabāhiraṃ, evaṃ gopetha attānaṃ, khaṇo ve mā upaccagā. || Th_653 ||

nābhinandāmi ... (= 606,607) || Th_654-655 ||

pariciṇṇo ... (= 604,605) || Th_656-657 ||

sampādeth’ appamādena, esā me anusāsanī; handāhaṃ parinibbissaṃ, vippamutto 'mhi sabbadhīti. || Th_658 ||

Revato thero.

Yathāpi bhaddo ājañño dhure yutto dhurassaho mathito atibhārena saṃyugaṃ nātivattati, || Th_659 ||

evaṃ paññāya ye tittā samuddo vārinā yathā na pare atimaññanti; ariyadhammo 'va pāṇinaṃ. || Th_660 ||

(068) kāle kālavasam pattā bhavābhavavasaṃ gatā narā dukkhaṃ nigacchanti, te 'dha socanti māṇavā. || Th_661 ||

unnatā sukhadhammena dukkhadhammena vonatā dvayena bālā haññanti yathābhūtaṃ adassino. || Th_662 ||

ye ca dukkhe sukhasmiñ ca majjhe sibbanim ajjhagū, ṭhitā te indakhīlo va, na te unnataonatā. || Th_663 ||

na h’ eva lābhe nālābhe na yase na ca kittiyā na nindāyaṃ pasaṃsāya na te dukkhe sukhamhi ca || Th_664 ||

sabbattha te na lippanti udabindu va pokkhare, sabbattha sukhitā vīrā sabbattha aparājitā. || Th_665 ||

dhammena ca alābho yo yo ca lābho adhammiko: alābho dhammiko seyyo yañ ce lābho adhammiko: || Th_666 ||

yaso ca appabuddhīnaṃ viññūnaṃ ayaso ca yo: ayaso ca seyyo viññūnaṃ na yaso appabuddhinaṃ. || Th_667 ||

dummedhehi pasaṃsā ca viññūhi garahā ca yā: garahā 'va seyyo viññūhi yañ ce bālappasaṃsanā. || Th_668 ||

sukhañ ca kāmamayikaṃ dukkhañ ca pavivekiyaṃ: pavivekiyaṃ dukkhaṃ seyyo yañ ce kāmamayaṃ sukhaṃ. || Th_669 ||

jīvitañ ca adhammena dhammena maraṇañ ca yaṃ: maraṇaṃ dhammikaṃ seyyo yañ ce jīve adhammikaṃ. || Th_670 ||

kāmakopapahīnā ye santacittā bhavābhave caranti loke asitā, n’ atthi tesaṃ piyāppiyaṃ. || Th_671 ||

bhāvayitvāna bojjhaṅge indriyāni balāni ca pappuyya paramaṃ santiṃ parinibbanti anāsavā 'ti. || Th_672 ||

Godatto thero.

uddānaṃ: Revato c’ eva Godatto therā dve te mahiddhikā Cuddasamhi nipātamhi, gāthāyo aṭṭhavīsatīti.

Cuddasanipāto niṭṭhito.

http://www2.hf.uio.no/common/apps/permlink/permlink.php?app=polyglotta&context=ctext&uid=0d528298-8d52-11e6-98cc-0050569f23b2

Choose languages