Bibliotheca Polyglotta

mi gnas dbaṅ po źi ba gaṅ źig yul rnams la | | stobs rab dbaṅ po ñid las yaṅ dag me gnas śiṅ | |
gźan rnams kyis ma thob pa’i lam bzaṅs thob pa ste | | ro mkhyen pas ni ṅes par ’byuṅ ba’i ro gsol to | |

(5)gaṅ gis sṅar ma byin pa’i sbyin pa byin pa ste | | ’bras bu ’dod pas cuṅ zad źig ni mi byin la | |
mñam ñid rjes mthun phun sum tshogs pa dor ba ste | | dam pa rnams kyi yid rnams yon tan rnams kyis phrogs | |

brtan pas mi dge ba las mi dge rnam spaṅs nas | | dge legs kyi ni dgra bo skyon rnams spaṅs pa (7)ste | |
gaṅ źig blo yis ñes pa rnams ni kun spaṅs la | | de ni ’phags min mi rtag ñid kyis nub par gyur | |

gaṅ la chos ni ’dod pa yaṅ dag rjes soṅ źiṅ | | dga’ bas mchog tu ṅes pa rnam par bzuṅ ba ste | |
me yis nor ni zos pa ji lta ba bźin du | | khyab bdag ye (96a1)śes nor can de yaṅ srog soṅ ṅo | |

brgyad po rnams la mchog tu sde tshen lṅa thul źiṅ | | gsum gzigs spyod pa gsum ni zad byed spyan gsum pa | |
gcig ni bsruṅs nas gcig ni thob nas gcig rtogs nas | | lci ba bdun rnams spaṅs nas (2)bla ma gzims par gyur | |

gaṅ gi źi ba’i ched du lam ni gsal mdzad de | | legs pa’i skye bo źi bas rab tu daṅ mdzad ciṅ | |
ñon moṅs ljon śiṅ rab tu chags pa bcad pa ste | | srid pa rnams las gus pa ldan pa rnams bsgral to | |

gsuṅ gi bdud rtsis ’jig rten śin tu tshim (3)mdzad ciṅ | | bzod pa yis ni khro ba yoṅs su bzuṅ ba ste | |
slob ma’i sde ni dge legs la ni rol mdzad la | | dge legs don du gñer rnams phra mo rtogs su bcug | |

legs pa rnams la chos kyi sa bon skyed mdzad ciṅ | | rgyu yi bdag ñid ’phags pa’i lam ni thob mdzad la | |
(4)’jig rten ’das pas ’phags pa min pa ma brten źiṅ | | chos las ma gtogs gźan la sbyar ba ma yin no | |

k’a śi gnas su chos kyi ’khor lo bskor ba ste | | blo daṅ ldan pa ñid kyis ’jig rten tshim mdzad ciṅ | |
gdul bya rnams ni chos kyi cho gar spyad mdzad la | | bdag cag (5)rnams la phan pa’i ched du dge bar mdzad | |

gźan rnams kyis ma mthoṅ ba’i de ñid mthoṅ mdzad ciṅ | | yon tan rnams kyis chos byed rnams la sbyar ba ste | |
gźan gyi lugs rnams tshar bcad nas ni skul gyur la | | rtogs par dka’ ba’i don ni rnam par śes par mdzad | |

(6)thams cad mi rtag pa daṅ bdag med par gsuṅs śiṅ | | srid pa rnams su bde ba cuṅ zad ma bsruṅs la | |
sñan pa’i ba dan gyen du rnam par bsgreṅs pa ste | | ṅa rgyal ka ba mthon po rnam par bskyel ba mdzad | |

smad kyaṅ raṅ gi thugs ni bskyod pa ma yin źiṅ | | thams cad (7)la ni ’jug pa rnams la sred ma mdzad | |

raṅ ñid rgal źiṅ byiṅ ba bsgral bar mdzad pa ste | | źi źiṅ pha rol ’khrul pa źi bar mdzad gyur la | |
grol źiṅ pha rol bciṅs pa grol bar mdzad pa ste | | rtogs śiṅ pha rol rmoṅs pas rtogs pas mdzad pa’o | |

thub pa thub pas tshul daṅ (96b1)tshul min mkhyen ’di des | | sems can rnams ni yaṅ dag gtam gyis rjes bzuṅ nas | |
tshul min la dga’ tshul min ’byuṅ po rnams la ni | | bskal pa ’jig pa’i tshe na chos bźin rab tu gzims | |

chu ldan sbrin bźin sa ’dzin ri bo nags tshal bźin | | ’od ldan rgan po (2)bźin du ’od ldan gźon nu bźin | |
’jig rten dag gi lta byed bcom nas ’jig rten gyi | | lta byed ñe bar phrogs nas ’gros su ’di gśegs so | |

dbaṅ phyug dam pa gaṅ la ltuṅ bas me reg ciṅ | | gaṅ gis mchog tu źi ba’i lam ni brñes pa ste | |
źi ba brñes pa de ni gus (3)pas mthoṅ nas su | | de riṅ ’jig rten gñen ’dun med ciṅ rgud pa ’dra | |

’joms par ’dod ciṅ stobs ni rab źugs bdud kyaṅ ni | | sde daṅ bcas pas gaṅ ni thub par ma nus pa | |
’joms par ’dod ciṅ stobs źugs bdud kyis de riṅ ni | | de ni dus kyi sbyor las ’joms (4)par nus par gyur | |

’byuṅ po rnams ni thams cad rnams ni ’dus pa rnams | | sdug bsṅal rnams kyis zil non lha daṅ bcas pa rnams | |
’khor ba’i ’jigs pa gaṅ rnams zad pa ma yin źiṅ | | de ltar mchog tu mya ṅan ’das pa thob ma yin | |

skye dgu rnams kyi snaṅ mdzad (5)gaṅ gis ’jig rten ni | | ñe bar skye ba me loṅ bźin du gzigs pa ste | |
rgyaṅ riṅ du’am ñe bar mtho ris su’am mthar | | lha yi rna bas sgra ni rnam par thos pa’o | |

Permanent link

http://www2.hf.uio.no/common/apps/permlink/permlink.php?app=polyglotta&context=ctext&uid=867f9da4-e7a7-102d-829a-001cc4df1abe

Choose languages

Choose images, etc.

Choose languages

Choose display