Bibliotheca Polyglotta

Complete text

(006) 7 Sattaputtakhādakapetavatthu

Vv_I,7[=7].1 Naggā dubbaṇṇarūpāsi duggandhā pūti vāyasi makkhikāhi parikiṇṇā kā nu tvaṃ idha tiṭṭhasī ti. || 35 ||

Vv_I,7[=7].2 Ahaṃ bhadante petī ’mhi duggatā Yamalokikā pāpakammaṃ karitvāna petalokaṃ ito gatā. || 36 ||

Vv_I,7[=7].3 Kālena satta puttāni sāyaṃ satta punāpare vijāyitvāna khādāmi te pi nā honti me alaṃ. || 37 ||

Vv_I,7[=7].4 Pariḍayhati dhūmāyati khudāya hadayaṃ mama nibbutiṃ nādhigacchāmi aggidaḍḍheva ātape ti. || 38 ||

Vv_I,7[=7].5 Kin nu kāyena vācāya manasā dukkaṭaṃ kataṃ Kissa kammavipākena puttamaṃsāni khādasī ti. || 39 ||

Vv_I,7[=7].6 Ahū mayhaṃ duve puttā ubho sampattayobbanā sāhaṃ puttabalūpetā sāmikaṃ atimaññisaṃ. || 40 ||

Vv_I,7[=7].7 Tato me sāmiko kuddho sapattiṃ aññam ānayi sā ca gabbhaṃ alabhittha, tassā pāpaṃ acetayiṃ. || 41 ||

Vv_I,7[=7].8 Sāhaṃ paduṭṭhamanasā akariṃ gabbhapātanaṃ tassā temāsiko gabbho pūtilohitako pati. || 42 ||

Vv_I,7[=7].9 Tad’ assā mātā kupitā mayhaṃ ñātī samānayi sapathañ ca maṃ kāresi paribhāsāpayī ca maṃ. || 43 ||

Vv_I,7[=7].10 Sāham ghorañ ca sapathaṃ musāvādaṃ abhāsisaṃ:

puttamaṃsāni khādāmi sace taṃ pakataṃ mayā. || 44 ||

Vv_I,7[=7].11 Tassa kammavipākena musāvādassa cūbhayaṃ puttamaṃsāni khādāmi pubbalohitamakkhitā ti. || 45 ||

Sattaputtakhādakapetavatthu sattamaṃ

http://www2.hf.uio.no/common/apps/permlink/permlink.php?app=polyglotta&context=ctext&uid=e1ea3fcf-8d51-11e6-98cc-0050569f23b2

Choose languages