sarvaṃ khalv idaṃ brahma tajjalān iti śānta upāsīta |
atha khalu kratumayaḥ puruṣo yathākratur asmiṃl loke puruṣo bhavati tathetaḥ pretya bhavati |
sa kratuṃ kurvīta ||

punas tasyaiva tripādam ṛtasya brahmaṇo ’nantaguṇavato ’nantaśakter anekabhedopāsyasya viśiṣṭaguṇaśaktimatvenopāsanaṃ vidhitsannāha-sarvaṃ samastaṃ; khalv iti vākyālaṅkārārtho nipātaḥ | idaṃ jagannāmarūpavikṛtaṃ pratyakṣādiviṣayaṃ brahmakāraṇaṃ vṛddhatamatvād brahma | kathaṃ sarvasya brahmatvam ity ata āha-tajjalān iti | tasmād brahmaṇo jātaṃ tejobannādikrameṇa sarvam | atas tajjam | tathā tenaiva jananakrameṇa pratilomatayā tasminn eva brahmaṇi līyate tadātmatayā śliṣyata iti tallam | tathā tasminn eva sthitikāle ’niti prāṇiti ceṣṭata iti | evaṃ brahmātmatayā triṣu kāleṣv aviśiṣṭaṃ tadvyatirekeṇāgrahaṇāt | atas tad evedaṃ jagat | yathā cedaṃ tad evaikam advitīyaṃ tathā ṣaṣṭhe vistareṇa vakṣyāmaḥ | yasmāc ca sarvamidaṃ brahma, ataḥ śānto rāgadveṣādidoṣarahitaḥ saṃyataḥ sanyat tat sarvaṃ brahma tadvakṣyamāṇair guṇair upāsīta | katham upāsīta | kratuṃ kurvīta kratur niścayo ’dhyavasāya evam eva nānyathety avicalaḥ pratyayas taṃ kratuṃ kurvītopāsītety anena vyavahitena sambandhaḥ | kiṃ punaḥ kratukaraṇena kartavyaṃ prayojanam | kathaṃ vā kratuḥ kartavyaḥ kratukaraṇaṃ cābhipretārthasiddhisādhanaṃ katham ity asyārthasya pratipādanārtham athety ādigranthaḥ | atha khalv iti hetvarthaḥ | yasmāt kratumayaḥ kratuprāyo ’dhyavasāyātmakaḥ puruṣo jīvaḥ | yathākratur yādṛśaḥ kratur asya so ’yaṃ yathākratur yathādhyavasāyo yādṛṅ niścayo ’smiṃl loke jīvann iha puruṣo bhavati tatheto ’smād dehāt pretya mṛtvā bhavati | kratvanurūpaphalātmako bhavatīty arthaḥ | evaṃ hy etac chāsrato dṛṣṭam | yaṃ yaṃ vāpi smaran bhāvaṃ tyajaty ante kalevaram ityādi | yata evaṃ vyavasthā śāsradṛṣṭātaḥ sa evaṃ jānan kratuṃ kurvīta yādṛśaṃ kratuṃ vakṣyāmas tam | yata evaṃ śāsraprāmāṇyād upapadyate kratvanurūpaṃ phalam ataḥ sa kartavyaḥ kratuḥ || 1 ||