sa evādhastāt sa upariṣṭāt sa paścāt sa purastāt sa dakṣiṇataḥ sa uttarataḥ |
sa evedaṃ sarvam iti |
athāto ’haṃkārādeśa eva |
aham evādhastād aham upariṣṭād ahaṃ paścād ahaṃ purastād ahaṃ dakṣiṇato ’ham uttarato ’ham evedaṃ sarvam iti ||

kasmātpunaḥ kvacinna pratiṣṭhita ityucyate | yasmātsa eva bhūmādhastānna tadvyatirekeṇānyadvidyate yasminpratiṣṭhitaḥ syāt | tathopariṣṭādityādi samānam | sati bhūmno ’nyasminbhūmā hi pratiṣṭhitaḥ syānna tu tadasti | sa eva tu sarvam | atastasmādasau na kvacitpratiṣṭhitaḥ | yatra nānyatpaśyatītyadhikaraṇādhikartavyatānirdeśātsa evādhastāditi ca parokṣanirdeśāddraṣṭarjīvādanyobhūmā syādityāśaṅkā kasyacinmā bhūdityathāto ’nantaramahaṅkārādeśo ’haṅkāreṇā’diśyata ityahaṅkārādeśaḥ | draṣṭurananyatvadarśanārthaṃ bhūmaiva nirdiśyate ’haṅkāreṇāhamevādhastādityādinā || 1 ||